Ika-upat ka Pulong, nadutlan ka ba?

Samtang naghinangat pa ang Semana Santa, inahan sa akong kanhi kauban sa trabaho namatay tungod sa katigulangon na.

Matud pa sa mahigalaong anak, human kuno gihilogan ilang Mommy sa pari, sa wala pa mamatay, tin-aw pa kunong nakasulti og: “Thank you, Lord!”

Pagkamalipayon nga kamatayon! Kay human hingpit makapanglimpyo sa tanan niyang sala, tingale (ubos sa akong pangagpas), giingnan pod sa atong Ginoo: “Karon, karon dayon, mahiuban ka Kanako sa Paraiso.” Busa mapahiyomong nakatuaw: “Thank you, Lord.”

Ubos sa naglagiting nga kainit sa Biyernes Santo, sa nagdupang mga kamot itaas sa krus, padayon ang panawagan ni Hesukristo ngadto sa tanang makasasala, nga mobalik na Kaniya ug maghinulsul. Kay sama ni Dimas ug Mommy, sila Iyang pasayloon.

Ug may mga lider ba sa atong nasod nga misundog sa gibuhat nila ni Mommy ug Dimas, kinsa human kinasingkasing nagbasol sa ilang pagkamakasasala, dihadiha sila gipasaylo ug iuban pa ni Hesus sa Paraiso?

Subo palandungon, nga padayon nilang gigukod ang God preacher, Kingdom of Jesus Christ founder Pastor C. Quiboloy ug uban pang pro-good governance leaders sa Pilipinas.

Daw gipakita nila sa katawhan, ang pagsugod og implementar sa pro-oligarch-governance, diin dili ang kabubut-on sa Diyos maoy ilang sundon, kondili ang ilang kaugalingong hiwing pagpamunoan ang masunod.

Naguol kaayo si Hesus niini. Kay mianhi Siya aron pagtubos sa tanang makasasala. Apan giisnab lang nila. Walay kinutoban Iyang gugma ug kaluoy. Busa, gusto Niyang patas-an pa ang maong tagal. Sanglit, gusto gyod Siyang maluwas tanang makasasala.

Apan may kinutoban kini. Miabot na ang tukmang takna nga Siya mamatay. Ang pagkapupos sa Iyang misyon nga gitagal sa Amahan.

Hinungdan, itaas sa balabag, sa hataas tingog igo na lang Siya sa pagtiyabaw: “Diyos Ko, Diyos Ko, nganong gibiyaan Mo Ako?” Dili ra ang Ginoo maoy gimahay ni Hesus.

Hasta katawhan, gikan sa kinaubsan ngadto sa kinatas-an, kinsa inay mopasilong sa Iyang landong, mibiya hinuon Kaniya.

Ikaw, higala, nadutlan ka ba sa bug-at mensahe sa ika-upat ug kinatibuk-ang kataposang Pito Niya ka Pulong sa wala pa Siya mamatay?  Ug sa miaging Marso 31, 2024. Adlawng Domingo sa Pagkabanhaw, ikaw nahisama nila ni Mommy ug Dimas, nabanhaw usab?

Kaanindot unta!