Hit and run nagkadaghan

Niining panahon nga ang kanhi mga ligdong cabinet members nga gipamutang sa puwesto ni former President Rodrigo Roa Duterte, gipangilisan ni karon Pangulo Bongbong Marcos (PBBM) og mga haguka, kinsa halos pulos nahilambigit sa dili matagong korapsiyon sama sa confidential funds, smuggling, hoarding, PCSO lotto jackpot winners controversies ug uban pa, namalik sab pagdaghan ang nagkalainlaing badlungon sa katilingban. Apil na ang mga abusadong nagmotorsiklo sa kadalanan.

Sa miaging Marso 7, puwerte intawong amping sa Innova white gikan sa One Pavilion condo-department store nga padulong mo-left turn paingon sa Labangon, alas 9:00 sa buntag.

Mi-give way man tuod ang naglarayng nanghunong mga sakyanan nga anaa na sa ngilit sa separate line, diin sobra ka mainampingon ang Innova nga mogawasay, dihang.,.mikalit lag paka iyang atubangang bahin. Nga gisaghiran sa naghaguros nga motorskilong gisakyag duruha: lalaking drayber ug babayeng angkas.

Labihang siyagit sa mga nakaestambay-nakasaksing mga habalhabal drivers haduol sa gasoline station aron pahunongon ang motorsiklong mi-hit and run, apan wala gyod mopatuo. Kay diay, grabing gubaa sa front right side sa Innova.

Marso 14, 2024. Alas 11:00 pasado sa buntag, may nakit man kong duha ka traffic aide nga nagbarog tungod sa China Bank atbang sa Jollibee, corner M. Velez Street-V. Rama, akong giduol ug giistoryahan unsa na kadaghang abusado ang mo-counterflow ning lugara ug dili ra ba manghunong bisan nakasaghid-disgrasiya.

Abi ninyo unsay tubag ni traffic aide I Jayson B. Cabrera? “Mao lagi, Sir. Tungod sa kadaghan, dili na maatog dakop. Gani, karon lang buntaga, 17 na ka buok akong natikitan.

Walay labot sa duha nga ako gyong gipa-impound. Hasta nang akong kaubang traffic aide, may 15 ka offenders sab nang nangadakpan karon.”

Unya, siya mipadayag, nga mas nindot kuno kadtong Execuive Order (EO) 34 ni kanhi Mayor Tommy Osmeña, diin ang masakpang sakyanang mo-counterflow, i-impound gayod. Busa, nadisiplina ang mga gahi ug mihinay counter-flow cases.”

Bitaw, Cebu City Mayor Mike Rama, hain kahay maayo kon ibalik ang istriktong pag-implementar niadtong maong EO nga ning panahon ni PBBM milugak na? Kay kon i-impound lang ang tanang mo-counterflow, seguradong maluagluag gyod atong karsada.

Ug mominus ang mga badlungon, kinsa mahilig sa hit and run!