OFWs giluod na

Samtang ang Pilipinas nag-ilaid sa kapait tungod sa walay pagpakabanang pagpamunoan sa ander de sayang Presidente Bongbong Marcos (PBBM), hala padayon ang pagpunay niinig biyahe ngadto sa nagkalainlaing kanasoran dala ang happy go lucky nga kinaiya, uban sa iyang maharihariong First Lady, ambisyosong House Speaker Martin Romualdez ug hinigtan sa ilang liog nga mga entourage gamit ang kuwarta sa katawhan.

Gumikan ning gipakitang pagkagastador ug pagka-insensitive ni PBBM, kinsa maayo lang sa saad unya wala sa buhat?

Ug sa iyang pagsalikway sa mga ligdong-tarong mga mangangalagad sama nila ni kanhi: Bucor Chief General Gerald Bantag, Executive Secretary Vic Rodriguez, Press Secretary Trixie Cruz Angeles ug uban pa, diin iyang gipamulihag mga hiwi? Aw, nahiwi sab pag-ayo ang dagan sa atong nasud karon.

Ang nakaparat kay hasta si Bise Presidente Sara ‘Inday’ Z. Duterte-Carpio, former President Rodrigo Roa Duterte (FPRRD), Kingdom of Jesus Christ founder Pastor Apollo C. Quiboloy, kinsa maoy nakapadaog ni PBBM sa miaging piniliay, gipasagdan lang niyang gukdon, piiton ug ipabilanggo sa mga opisyal gikan sa Department of Justice ngadto na sa House of Congress and Senate, inay iyang tabangan ug panalipdan gamit ang iyang kinatas-ang ehekutibong gahom.

Ang mga Overseas Filipino Workers (OFW), kinsa gisaaran niya nga dili na mistil manrabaho sa gawa sanglit kon siyay modaog, patas-an niya ang suweldo sa tanang mamumuo pero atik-atik ra diay, wala na gayod mahimuot niya. 

Samot na, nga mibalik pag-abunda ang dakong problema sa illegal drugs, diin pipila ka OFWs naguol.

Kay ilang igsuon o anak nga na-rehab na unta panahon sa war on drugs ni FPRRD, karon naggumon na pod!

Mao nga kada bisita ni PBBM sa lainlaing nasud, nagkaanam kadiyotay ang Filipino community nga mosugat-motambong.

Ug kon aduna man gani, sama niadtong iyang bag-ohay lang pag-adto sa Australia, may mga OFW nga magdalag plakard, diin nakasulat: 

‘Marcos Plunderer, Corrupt, Liar, War criminal. Not welcome here!

No justice, no peace.’

Ang mas sakit, duna pay naghimog effigy ni PBBM. Unya, nagpulipulig yatakyatak dungan ang masuk-anong emosiyon:  “Durogin! Durogin!’

Kini base sa gi-post sa DDS vlogger sa social media.

Pastilan, akoy gisakitan sa ilang gihimo. Tiaw bay, ilang gipakita nga gisuka-giluod na gyod sila ni PBBM.