Gil-as nga mga kasikas

Wala na kapugngi ang pailob nga hagbay rang giantos sa mga dumadapig ug miyembro sa Kingdom of Jesus Christ (KJC) ni Pastor Apollo C. Quiboloy, kinsa mga saksi giunsa paglatos, pagpiit ug paggukod sa administrasiyong Marcos ang ilang pinalanggang Son of God.

Gikan sa dili makatarunganong pagsuspenso sa SMNI gamit ang giyawaang gahom sa Kongreso ug Senado hangtod ngadto sa pagpanghayir ni Senador Risa Hontiveros og mga nagmaskarang testigos, kinsa sagad may gibasang script nga miguba pag-ayo sa limpiyong imahe sa pastor, kini maoy hinungdan, nga sa miaging Marso 4, 2024, sila nag-rally didto sa Liwasan Bonifacio sa kaulohan.

Dala ang nagkalainlaing rally materials nga may nakatatak: ‘Risa, resign’, ‘Risa stop human rights abuses’, ‘Permanently restore freedom of the press’, ‘Protect the Constitution, ‘Stop massive corruption’, ‘Justice for Pastor Apollo C. Quiboloy’ ug daghan pa, ila kining giisa-isa dungan ang kinasingkasing nga pagsinggit: “Hustisya! Hustisya! Hustisya!”

Unya, pagkaugma, Marso 5, didto na pod sila atubangan sa Balay-Senado nag-rally agi'g pakita unsa sila ka andam sa pagsuporta-protehir sa ilang pastor ug sa atong yutang natawhan.

Niadtong bulan sa Enero 2024 nahimugso ang unang Davao City Candlelight Prayer Rally. Sa miaging Pebrero misunod ang ikaduha; Cebu City Candlelight Prayer Rally. Diin, soft and hard man ang pagpakigpulong ni Tatay Digong, pero usa ray unod: pulos dismayado na ang kinabag-ang Pinoy  niining salawayong  pagpamunoan ni Presidente Bongbong Marcos (PBBM), kinsa nagpaguryongguryong nga wala siyay kalabotan sa People’s Initiative nga gipanghingusgan pag-ayo ni House Speaker Martin Romualdez ug First Lady Liza nga matuman. Pero mao pod diay gusto.

Pagahilantawan nga may mga sumpay pa kining nahitabong mga rally. Kon sa Visayas ug Mindanao human na, may mapaabot pang lain sa Luzon. Kon kanus-a? Ang mga secret organizers ray nasayod kon ianunsiyo ba kini, o dili? Mga kasikas kini nga gilas kaayo paminawon. Ambot, kon giseryoso ba sa pag-analisar sa administrasiyong Marcos?

Kay kon ang panawagan ni kanhi Cardinal Sin sa katawhan nga mag-people power niadtong 1986 aron mapalagpot si anhing Ferdinand E. Marcos Sr. sa Malakanyang, basin bayag ang panawagan sab ni Pastor Quiboloy sa nabudol nga katawhan, makapatalsik sab ni Jr.?

Anaa ra gyod ni PBBM ang pinaleng paghukom!