Ash Wednesday ug Valentine’s Day

Adlaw karon nga kitang mga Romano Katoliko gipapili unsay atong gusto: ‘Magpabadlis sa agtang gamit ang sagradong abo, o magpabilin maglunang sa atong mga sala?’

Karong adlawa atong mahibaw-an unsang dapita ang mapuno: simbahan, o motel-hotel-short time inns’ rooms ba?

Valentine’s Day gani, malipay mga tag-iyag beach/mountain resorts, bars and restaurants. Kay mao man dayoy dugokon sa nagselebrar nga mga nagminahalay: magtiayon, tibuok pamilya o mga ulitawo’g dalagang nagkahigugmaay.

Busa, moginansiya gyod silag dako. Samtang ang simbahan, balay sa atong Ginoo, kinsa maoy naghatag sa tanang anaa kanato, para maoy igasto sa atong gikaon-order, gihimong second choice na lang.

Sagad, kalimtan pa sa hingpit. Hain na ba ang atong utang kabubut-on ngadto Kaniya?

Kon kita mosulod sa simbahan, walay bayad. Pero nganong sagad sa matag Misa sa Badlis, dili man mapuno ang mga lingkoranan?

Kini base sa daghang nanglabayng Ash Wednesday nga solo ra niini ang maong adlaw ug walay Valentine’s Day nga kompetensiya.

Unsa na kaha karong adlawa, diin nagdungan ang Ash Wednesday ug Valentine’s Day?

Sa bagay, anaa ra sa atong kaugalingon ang paghukom. Magpabadlis ba tag abo sa atong agtang nga magiya nato ngadto sa dalan sa kaluwasan, o ipadayon nato ang pagbadlis sa nagkadakong numero sa atong pagkamasalaypon nga makalaglag sa atong kalag sa dayon?

Angay hinumdoman. Walay usa kanato ang nasayod kanus-a moabot atong kamatayon.

Ang ngilngig-dakong landslide didto sa Davao nga miangkon og hinanaling kamatayon sa daghang nalubong-buhi ug niining bag-o, ang kalit nga pagtaliwan sa himsog former Don Bosco varsity player Jeslar Uriel Larumbre tungod lang sa road rage, mga pagpangablit kini gikan sa Kahitas-an nga angay natong hinuktokan.

Nakapangandam kaha silang tanan sa wala pa mamatay? Nakapanghugas kaha sa ilang sala pinaagi sa Sakramento sa Pagkompisal-Pagkalwat ug pagsunod sa kabubut-on sa Ginoo nga maoy Iyang taksanan, paghukom asa Niya kita papuy-a: langit ba o impiyerno, sa sunod natong kinabuhi nga wala nay kataposan?

Karong adlawa, Pebrero 14, 2024, kita gihatagan na usab Niyag chance sa pagpili: Ash Wednesday – dalan paingon sa kaluwasan?  Or Valentine’s Day – tawhanong paraisong napuno sa pre-marital sex nga maka-impiyerno?

Mga igsuon ko, please select the best before it’s too late.