Kongreso walay tahod sa pangulo
Sa miaging Nobiyembre 20, 2023, mihimog House Resolution (HR) No. 1477 ang Kongreso nga pinangamahanan nila ni Manila 6th District Representative Bienvenido Abante, House committee on human rights chairperson ug 1-Rider Representative Ramon Rodrigo Gutierrez, nga magtugot sa International Criminal Court (ICC) nga paimbestigahan ang mga nahitabong krimen nga giisip sa mga pinklawans, dilawans, Makabayan Bloc ug Commission on Human Rights nga extra judicial killings panahon sa madugoong War on Drugs ni kanhi Presidente Rodrigo Roa Duterte.
Hagbay ra bayang giklaro ni karon Presidente Bongbong Marcos (PBBM) atubangan sa publiko, nga walay ICC nga iyang tugotan nga maoy mangunay pag-imbestigar ning maong kaso. Matod niya:
“My position hasn’t changed. And I have often stated it even before I took office as a President that there are many questions about their jurisdiction and what we in the Philippines regard as an intrusion into our internal matters and a threat to our sovereignty. So, no, I do not see what their jurisdiction is. I feel that we have in our police, in our judiciary, a good system. We do not need assistance from any outside entity.”
Unya, mipuno: “Basta, tapos na lahat ating pag-uusap sa ICC. At kagaya sa sinabi namin mula sa simula pa, we will not cooperate with them in any way or form.” Nga sa ato pa, hingpit nang gidesisyonan-sirad-an ni PBBM ang maong isyu.
Apan makahibulong? Human gi-aleluya sa Kongreso ang Makabayan Bloc ug ni House Speaker Martin Romualdez ang klaro kaayong paggukod nila kang VP Sara ‘Inday’ Duterte ug Tatay Digong ug tapos makapiyansa ang kanhi gibunyagag ‘Drug Queen of Bilibid’, miumol dayog HR 1477 si Abante ug Gutierrez.
Kini klarong nagpakita sa ilang pagkawalay tahod sa nahukman nang isyu ni PBBM – ang ‘Big No to ICC.’ Hinungdan, daghang nagmabinantayong sibilyan ug mga nakaunipormeng nagpakahilom ang nakapangutana; “Kinsa ba diay mas hawod: si Martin, o PBBM?’
Dinhi masukod ang baroganan ni PBBM: lig-on ba, o mausab-usabon? Nga kon simbako, masipyat siya sa paghukom, basin maoy sinugdanan pag-ulbo sa dakong kalayo nga nag-umido na daan. Unta, ang giya sa Kahitas-an maoy molamdag kaniya. Buwahan, dili mahimong impiyerno ang maong kalayo.
- Latest
