Hugaw nga kultura

Usa ka semana na ang milabay human sa piniliay sa barangay ug Sangguniang Kabataan, ug komusta na ang tanan, ilabina kadtong mga kandidato nga wala gisuwerte sa ilang paglansar. Naka-moved on na ba ang tanan?

Kadtong gibuligan sa maayong kapalaran padayon pa siguro ilang selebrasyon sa ilang kadaugan human sa halapad nga pangampanya alang sa mga posisyon sa barangay. Siguro misaler ilang mga estratehiya unsaon pagdani og mga botante.

Kadtong wala buligi sa maayong kapalaran siguro padayon pa ang ilang pagbangutan ug pagmahay sa ilang sayop nga desisyon hinungdan sa ilang kapildihan. Siguro padayon pa ang ilang mga pangutana kon unsay sayop sa ilang pangampanya.

Hinuon, human na ang bugnong lugaynon sa barangay ug angay na nga mo-move on ang tanan. Mas maayong i-charge to experience na lamang nato kon unsay nahitabo sa nakalabay nga eleksiyon. Aduna pay sunod nga piniliay

Sa akong obserbasyon, walay kalainan ang milabay’ng eleksiyon sa mga nangaging piniliay sa nasud. Kini kon ang kahusay ug kalinaw ang hisgutan. Atong nakita nga daghan gihapong election-related violence ang mibutho sa ubang lugar sa nasud.

Ug sa natad sa vote buying? Aw, padayon gihapon kini nga misugwak. Daghan gihapong mga kandidato ang midangop niini aron paghakot og mga botante. Gani, magpalabwanay pa ang mga kandidato sa pagpalit og mga boto aron lagi maangkon ang kadaugan.

Ambot pa nganong kabahin na kining pamalitay og boto matag eleksiyon sa atong kultura. Ug ambot pa nganong kulang sa kaikag ang atong otoridad pagsumpo niini. Siguro lisod na kini nga masumpo pa tungod kay lawom na kaayo ang gamot niini.

Ato lamang iampo ngadto sa kalangitan nga mausab pa kining maong kultura. Ug ang kausaban kinahanglan anhi magsugod sa hinayhinay nga edukasyon sa kagamhanan ngadto sa bag-ong generasyon mahitungod sa ka hugaw sa kultura sa pamalitay og mga boto.