Krisis gihimong inspirasyon sa Lodi Mag uuma sa bukid

Mahimo ba nimong ipanghatag nga libre sa ubang tawo ang imong hinagoan ug pinatul-an sa singot ug labaw sa tanan gigastohan og dako nga kantidad nga panginabuhian? Sa tinood lang murag dili seguro kay ang uban masayangan kay lagi ang laing tawo ang makapahimulos.

Apan kini ang gihimo sa usa ka mag uuma sa bukirang baranggay sa Sudlon 2 sa dakbayan sa Sugbo nga si Emilio Secretaria ug ang iyang tibook pamilya nga walay pagpduha duha sa pagpaambit sa ilang produktong kamatis ngadto sa mga tawo nga moadto sa ilang dapit. Libre pick and bring all you can ang peg ni Emilio. Sa upat ka ektaryang kamatisan lisod mahurot dayon ug maabtan sa pagpangalata sa bunga kon dili dayon ma-harvest busa inay malata kini sa punoan iya nalang gipanghatag sa mga tawo. Kong tuyoon mahalin ra man gyud ang iyang mga kamatis apan mahulog sa barato ug mosamot na sila sa pagka alkansi.

Gani mohapit sa dul-an sa tunga sa milyon ang ilang gasto sa kamatisan ug ang ilang naani lang 40 mil pesos lang pastilan hilabihan gyud ka dako sa alkansi.

Makapahugno gyud kung hunahunaon ang nawagtang sa pamilya ni Emilio, apan inay mawad-an og paglaum gigamit niya kining inspirasyon nga mobangon gikan sa krisis pinaagi sa paghatag og kalipay sa mga tawo sa kamatis nga ilang hinagoan. Kong sa ubang dapit adunay apple ug strawberry picking, sa ila ang tomatoe picking apan mas gipalabwan niya kay libre man.

Nahimong instant tourist attraction ang garden ni Emilio kay gibisita kini sa mga tawo gikan sa ubang mga dapit nga kadtong aduna pay mga nindot nga sakyananan. Matud sa pamilyang Secretaria nga dili kabayran og salapi nga makita ang ubang mga tawo nga malipayon nga napupo sa ilang abot sa yuta, kini matud pa ang tinood nga ginansaya nila.

Talagsaon ang gihimo nila, unsa himoon kining sumbanan sa uban, kay ang uban akong nalabyan nga mga garden gipalata ra man nila ang ilang abot, gani aduna akong naestorya nga tag iya nipadayag nga palat-on nalang nila ang kamatis kay himoong abuno inig abot sa ting-ulan. Maayo unta ila pud ipanghatag.

Niining panahona halos tanan galisod apan ang kalisdanan kong huna hunaon mosamot ka bug-at apan kong pangitaan kini og pamaagi nga makalingkawas kita pinaagi sa pagpaaambit sa grasya ngadto sa uban nganong dili man nato himoon.

Gipamatod-an sa pamilya ni Emilio nga mamahimo gihapon magmalipayon ang tawo taliwala sa kalisdanan nga nasinati basta ablihan nato ang atong panghuna huna ug kasing kasing kay kita ra gyud ang magbuot kong unsay atong pilion, maguol ba o malipay sa atong kinabuhi.