Paugat sa PUV modernization
Usa sa daghang problema nga gibilin ang administrasyon ni kanhi Presidente Rodrigo Duterte nga imbes korihian gipadayon sa administrasyon ni Presidente Ferdinand Marcos Jr. mao ang pataka nga pagpatuman sa modernisasyon sa public utility vehicles.
Giusikan ni Marcos ang dugang lugway sa programa nga magamit unta sa pagsubli sa kuwestiyonable nga mga lagda nga gibuyag di lang sa transport groups kon dili hasta sa ubang mga ahensiya sa gobyerno. Pero human sa pasalig sa kausaban sa programa ug pila ka buwan nga paglangay gipadayon ang tanang depektuso nga mga lagda.
* * *
Usa sa ilang gibungul-bungolan mao ang pasidaan sa Land Bank of the Philippines (LBP) ug Development Bank of the Philippines (DBP), ang gisugo pagpahuwam og kuwarta sa transport cooperatives ug corporations aron ipalit og modern jeepneys, sukad pa sa administrasyong Duterte:
• Taas ra ang presyo sa modern jeepneys nga ang kada unit mobalor og hangtod P2.8 milyones para sa ordinaryong drivers ug operators; nga
• Peligrong di makalahutay ang operasyon kay kuwang ra ang kita para sa binuwan nga datahan sa utang ug posibleng ma-imbargo ra dayong modern jeepneys.
* * *
Laing giisnab sa duha ka nakinopyahay nga administrasyon mao ang gisugyot sa LBP ug DBP nga mga sulbad sa problema:
• Pag-kontrolar og suppliers sa mas baratong modern jeepneys apil na ang local manufacturers;
• Pag-subsidize sa gobyerno sa presyo sa modern jeepneys aron nga di maproblema ang drivers ug operators sa pagbayad sa mas dakong utang; ug
• Pagtugot sa Land Transportation Franchising and Regulatory Board sa mas taas nga plitehan aron mas dako ang kita sa modern jeepneys.
* * *
Ang paugat sa mga administrasyong Duterte ug Marcos, gawas nga moputol sa panginabuhi sa kaliboan ka drivers ug operators, moigo sab sa kinabag-an sa nag-antos nang daan nga mga pasahero:
• Kun di umentohan ang plitehan, maalkanse ang modern jeepneys, pipila na lang ang makalahutay sa pagsubay sa ilang mga ruta ug matanggong ang minilyon ka pasahero sa kadalanan; sa pikas nga bahin
• Kon umintohan ang plitehan, magpadayong operasyon sa modern jeepneys, pero maproblemang mga pasahero pag-inat sa ilang kita nga mahimong nahurot na sa inadlawng panginahanglan ug binuwang abangan sa balay ug bayranan sa tubig ug kuryente.
* * *
- Latest
