Lig-on nga political will

Hagbay ra nga milapas ang Independence Day o June 12, ang petsa nga maoy gihimong deadline ni Mayor Michael Rama alang sa paghipos sa tanang libudsuroy ug ubang nagpuyo sa mga karsada palibot niining dakbayan sa Sugbo.

Apan sa atong nakita, hapit na duha ka semana human sa maong deadline, pabilin gihapon kining mga libudsuroy ug ubang nagpuyo sa karsada ning siyudad, ilabina sa Colon sa downtown area.

Miani og mga pagbatikos gikan sa mga kritiko ang maong kapalpakan kuno sa siyudad sa pagtuman sa maong deadline. Matud sa uban, nganong patugatuga pa man kuno’g pag-imposar og deadline ang siyudad nga dili ra man diay makab-ot.

Matud pa sa uban, dili gayud makab-ot ang tumong bisan kapila pa mag-imposar og deadline si Rama. Kini tungod kay bisan pa kon hiposon kining mga libudsuroy, mamalik ra gihapon sila sa ilang naandang puwesto sa karsada.

Hinuon, ato usab nga masabtan ang kahimtang sa lokal nga kagamhanan sa dakbayan. Bisan pa sa paningkamot ni Rama nga mawala na ang mga libudsuroy sa iyang giimposar nga deadline, dili gayud kini makab-ot ilalum sa unsa mang sirkumstansiya.

Gani, mipasidaan na ang mga barangay kapitan nga dili gayud nila makaya ang paghipos sa mga libudsuroy sa ilang mga lugar ug nga nanginahanglan sila og tabang gikan sa ubang ahensiya aron makab-ot ang maong misyon.

Dako gayud nga sagubangon ang misyon paghipos niining mga libudsuroy gikan sa kadalanan. Kadaghan na nga mi-attempt ang nangaging mga administrasyon niini. Apan pakyas sila sa makadaghan. Ug pabilin gihapon kining maong problema.

Mismo ako naglibog unsa gayud ang solusyon niining maong problema. Siguro, aron makab-ot ang maong misyon, nagkinahanglan kini og labing lig-on nga political will ug pagkumboya sa mga hingtungdan nga ahensiya sa kagamhanan.