Luha sa bata’ng makasasala

Kanhi PBA player nga si Eliud Poligrates ang natapsingan sa pagpusil kagahapong adlawa kinsa naigo ang iyang abaga ug ang gitumbok nga suspek ang 15-anyos nga lalaki didto sa Barangay Duljo Fatima dakbayan sa Sugbo.

Maayo gani kay wala maintimano ang basketbolista. Kay kong naigo pa sa bala sa kalibre 45 perti gyung pataya kay duol ra man kaayo ang suspek nga nipusil kaniya.

Kong si Poligrates ang pasultihon, nasuko ra kuno ang menor de edad nga wala niya mahatagi og kwarta dihang nangayo kini kay wala man siyay dala nga sinsilyo. Apan kong ang batan-on ang paestoryahon pagdumot ang nagtukmod kaniya sa paghimo sa krimen.

Nasuko kuno siya kay gidapatan siya ug ang iyang amigo sa basketbolista tulo ka buwan na ang nakalabay maong nahimo niya ang krimen. Pero sobra ra kaayo ang iyang gihimo kay ang pagkutlo man gyud sa kinabuhi ang iyang gitinguha.

Sa akong paghinabi sa bata, walay lipodlipod niyang giangkon nga nigamit siya og marijuana sa wala pa niya himoa ang krimen maong kursonada kuno kaayo siya sa iyang gihimo.

Mas nakapaalarma ang iyang pag-angkon nga nalambigit siya sa illegal nga drugas isip mamarokay.

Sa linghod nga pangidaron experto na kaayo siya sa mga buhat nga gukdonon sa balaod, naa usab matud pa siyay grupo nga nagsabak sa iyang mga gipanghimo.

Base sa pakisusi sa kapolisan, notado gyud ang grupo niining bataa ug mamirahay gyud kong kinsa ang ilang makontra piti gyud kong makursonadahan. Bisan pa man sa krimen nga iyang nahimo nagpakita pa sa iyang pagkabata kay nidanguyngoy man kini nga nangayo og pasaylo kay mahadlok nga mapriso.

Nagpangita sa iyang mga ginikanan nga unta luwason siya. Gani matud niini nga gusto niyang moeskwela apan ang iyang inahan ang nibabag sa iyang pangandoy maong nahiadto siya sa iyang mga barkada.

Responsibilidad sa mga ginikanan ang pag agak sa ilang mga anak ngadto sa katarong apan kong mismo sila ang walay magpakabana dili ikahibulong nga mahisalaag gyud ang mga anak.

Komon na kaayo kini karon sa atong katilingban nga sa linghod sa pangidaron sa mga bata makahimo og bug-at nga sala ilabi nga protektado sila sa balaod kay lagi menor de edad.

Basta matutokan lang unta sa mga ginikanan, gobiyerno ug ubang mga sektor dako pa kaayo ang paglaum nga maganoy ngadto sa katarong ang mga bata nga nalambigit sa pagpakasala ug mahatagan sa tinuod nga ikaduhang kahigayonan sa pagbag-o sa kinabuhi aron mapuslan sa katilingban.