Mastermind mailhan

Nagtuo ko nga mahibaw-an ra gyud kon kinsa ang mastermind aron patyon si Negros Oriental governor Roel Degamo. Matud sa report nga naglumba karon ang upat ka dinakpan nga gustong mag-state witness.

Gani, gibutyag sa kadagkoan sa Department of Justice nga gitan-aw nila karon ang posibilidad nga duha sa mga dinakpan ang himoon nilang state witness, ug ipailawom sila sa State Witness Protection and Benefits Program sa kagamhanan.

Hinuon sa Witness Protection Program, ang maka-avail kadto ra’ng mga akusado nga “less guilty” sa kaso, unya kinahanglan nga ang ilang mga testimoniya lig-on ug magamit gyud aron masilotan ang mga nakahimo’g bug-at nga salaod.

Kon mao man gani, kinahanglan nga sutaon sa mga imbestigador kon unsay ilang partisipasyon atol sa pagronda sa balay ni Degamo kay nakuhaan man og CCTV.

Para nako, kadtong mga armado nga mipusil gyud sa mga inosenteng sibilyan, angay gyud silotan uban sa mastermind. Para nako, lig-on ang ebidensya sa kapolisan ug militar batok sa mga dinakpan.

Una, ang ilang gigamit nga sakyanan atol sa pagronda nila sa balay ni Degamo didto sa Pamplona sa Negros, nakuhaan og CCTV sa pag-abot niini, unya ang maong mga sakyanan na-recover sa mga polis nga gibiyaan ra didto sa Bayawan City.

Ikaduha, matud sa report nga ang mga armas nga na-recover sa kapolisan ug militar gikan sa mga dinakpan, apil sa laing armado nga napatay sa enkwentro, napamatud-an nga mao ang mga armas nga gigamit pag-atake nila ni Degamo.

Unya, pun-an pa nga mo-state witness ang uban sa mga dinakpan, pwerteng lig-ona sa kaso.

* * *

Bisan og wa pay mibutyag nga ang kontra ni Degamo sa politika maoy nagpapatay kaniya, nanghimakak na daan si Kongresista Arnulfo Tevez Jr. nga wa siyay kalambigitan sa mao nga hitabo.

Nganong ipapatay man kuno niya si Degamo nga dili man ang iyang manghud maoy makapuli kaniya kay duna may bise gobernador. Husto sab. Daan na kuno siya nga nagduda nga moabot ang higayon nga kon may mahitabo kang Degamo siya dayon ang pasanginlan.

Pero lain pa’y ato. May lain diay’ng gipangpatay sa Negros Oriental kaniadtong 2019 nga si Kongresista Tevez ug kaubanan mao gihapon ang gituohan nga naghimo. Giimbestigar kini sa PNP-CIDG   apan kon wa mamatay si Degamo wa nila gipasaka ang kaso.

Daghan ang dili motuo nga natukma gyud nga ang ilang imbestigasyon nahuman dungan-dungan sa hitabo nga gipatay ang gobernador? Ang kaso batok ni Kongresista Tevez ug kaubanan, apil pa gani sa iyang secreary, gipasaka kaniadto ra nga Martes.

CIDG investigators, daghan ang nagduda niini kon nganong inyong gilangay-langay.