Bayanihan

Maghisgot kita’g Bayanihan, ordinaryo ug komon kaayo kini dinhi sa atong nasud. Apan, lagmit wala kini sa ubang kanasuran. 

Dihay video sa akong cellphone nga naghulagway sa mga tawo nagpas-an o nagyayong sa usa ka balay. Ang caption: “Locals carry elderly man’s house on their shoulders.” 

Niadtong adlawa miabot na’g kapin sa 2 milyones ang ni-view. Amused kaayo sila kay wala kini sa ilang nasud. Gi-share kini sa Good News Movement sa Instagram, gisuwat ni Shubhi Mishra.

Nahitabo kini sa Zamboanga del Norte. Mokabat sa 24 ka tawo ang nagyayong sa 7-feet high nga balay. Ang tuyo, aron ang senior citizen mahiduol sa iyang familia. Bali’g duha ka oras ang pagpas-an, subay sa dirt road ug libaungon nga dalan.

Ang nakanindot ra ba niining maong act of kindness, dili kini sila magpasuhol. Kahibawo man ta nga ang gugma mmaoy nagtukmod sa mga volunteers.

Kahinumdom ko nga dihay among gipabalhin nga payag (kalimot na ko sa Leyte ba kadto o sa Opon), nga monggos ray gipakaon. Ug lipay na kaayo sila.

By the way, didto diay mi bakwit sa Barangay San Roque, Tolosa, Leyte, diin ang mga igsuon ni Mama didto na manimuyo, hangtod nga niabot mi sa Samar, ug didto mi maatli pagtakas sa mga Amerikanhon. Nabalik mi sa Tolosa hangtud sa pag-landing na ni “I Shall Return” Douglas MacArthur sa Palo, Leyte (Am I this old? Bitaw, gisugilon lang kini ngari nako, after the war). 

Balik sa Bayanihan. Akong amiga misugilon kanako nga tungod kay dili man ila ang yuta nga gitukoran sa ilang balay, ila kining gipabalhin ngadto sa ilang luna. Sa San Isidro, Leyte.

Ang balay adunay tulo ka lawak, sala, ug kusina. Sa ato pa, dakudako gyud, bug-at, mao nga daghan ang miyayong niini.

Ordinaryo kini nga talan-awon dinhi sa atong nasud. Sa hilit nga kabalangayan, sa mga lungsod, sige pa kini karon. Wala na kini sa mga dakbayan, for obvious reasons. 

Daghang matang sa Bayanihan ang atong gi-practice. Panahon, pananglitan, sa mga katalagman, awtomatik ang pagbaha sa nagkalainlaing matang sa pagtabang. This is something we can be proud of being Filipinos. Ato kining i-maintain, ug i-sustain.

* * *

Mahinayon na gyud tingali ang Bus Rapid Transit (BRT), kay sumala sa napatik sa The Freeman:  “DOTr finally awards contract: Chinese firm to undertake BRT project.” Daghan nang mga susamang headlines ang atong nabasahan sa unang mga tuig. Sunod nga headline, aktwal na gayud pagsugod sa trabaho.

Ania: “The long-delayed Cebu Bus Rapid Transit (BRT) project is finally moving an inch forward after the Department of Transportation (DOTr) formally awarded the contract to a Chinese construction firm yesterday.” An inch forward pa man.

Kanus-a kaha ni ma-2 inches forward? Mao ra man og duna nay mga awarding sa unang mga tuig. Aniay apan: “Although the project has been awarded already the winning contractor needs to secure all the necessary permits before it could start the actual construction.”

Unsa man ni? “Working permits, building permits, excavation and hauling permits, underground installation permit.” ubp. Ang original nga implementation niini niadto pang 2016. Ug nakagasto na kita’g kapin sa “P29-M in cumulative commitment fees.”