^

Banat Opinyon

Sugod na’g kabuak

RENBOR PATROL - Rene U. Borromeo - Banat

Nakapahiyom ko nga nagtan-aw sa post diha sa social media nga sila si Cebu City Councilors Philip Zafra ug Dondon Hontiveros nangangkon na nga mga independente.

Usa ra ka pulong “Independent” ang gibutang nila sa ulang post, way pagpasabot kon unsay ilang gusto nga ipahibawo sa katawhan.

Sila si Zafra ug Hontiveros mga alyado sa politikanhong pundok nga Barug-PDP Laban nga gipangulohan nila ni Mayor Edgar Labella ug Vice Mayor Michael Rama.

Nakabantay ko nga wa kaayo magkahiusa ang mga sakop sa Barug-PDP Laban, ug nahadlok ko nga mabuak kini pipila ka adlaw gikan karon.

Kini maoy natan-aw nako nga rason nga sila si Zafra ug Hontiveros gusto nga mag-independente kay tingali maikog sila nga may dapigan nga grupo kon ang Barug-PDP Laban mabuak na kini ug mamugna ang duha ka pundok.

Pero dayegon nako sila si Zafra ug Hontiveros kon tinud-on nila nga mag-independente sila sa pagdagan nila pagbalik isip konsehal sa Cebu City atol sa pagpasaka sa ilang Certificates of Candidacy karong Oktubre 1 ngadto sa 8.

Apan nagduda ko nga may dapigan ra gihapon sila nga grupo, ug sigurado nga adto sila sa pundok nga pagapangulohan ni Vice Mayor Rama.

Mangutana mo kon ngano man? Si Zafra sa wa pa mahimong kapitan sa barangay ug konsehal sa siyudad, executive assistant ug Chief of Staff siya ni Rama, ug mao kini ang nagpadagan kaniya pagka kapitan sa Barangay Tisa. Si Hontiveros suod usab kaayo ni Rama, ug gani mao kini ang gusto niya nga ika-tandem sa pagka bise mayor kon mosang-at na siya sa iyang Certificate of Candidacy pagka mayor sa siyudad.

Apan ang ubang alyado sa Barug-PDP Laban mas pabor nga ang ika-tandem ni Rama mao si Konsehal Raymond Alvin Garcia.

Nahibaw-an nako nga kon si Rama dili gyud makadawat ni Konsehal Garcia nga iyang bise, mapugos ang mga opisyal sa PDP-Laban dinhi sa siyudad nga awhagon nila si kanhi Cebu City councilor Joey Daluz III nga modagan pagka mayor ug si Garcia ang iyang bise.

Kon mahitabo kini, buak ang grupo nga Barug-PDP Laban. Usbon nako, saludo ko nila ni Zafra ug Hontiveros kon tinud-on nila nga way dapigan sa duha ka grupo, ug barugan nila nga sila mga independente basi sa ilang gipasiatab na.

Akong nadunggan nga si Atty. Daluz maoy kandidato ni Davao City Mayor Sara Duterte kon magpapili kini sa labing taas nga katungdanan sa nasud. Mao ni ang paga-ingnon, nagbukal na ang kaldero sa politika dinhi sa Cebu City ug nag-anam na ka alegre.

PHILIP ZAFRA

Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with