Hala, mga JO gikilkilan!

Pastilan, duna gyuy mga tawo nga mohimo’g binuang nga wa maghunahuna nga makahimo sila’g kadaot sa administrasyon nga ilang gisandigan, nga nagpatrabaho kanila.

Nahinabi nako ang mga job order workers nga nadestino sa Parks and Playground Commission nga maoy nagdumala sa Plaza Independencia. Gitug-anan ko nila nga may mga tawo man nga mangilkil nila’g kwarta.

Kada sweldo ug sa paghatag sa ilang hazardous pay, pangayoan sila’g tag P20 kada usa. Sus, kay ang Parks and Playground Commission duna may mga 80 ka Job Order workers, makakwarta gyud ang tigpangilkil.

Awhagon nako si Mayor Edgardo Labella nga iya kining tagdon dayon. Ang mga job order workers sa Parks and Playground Commission mireklamo na, ang uban hinuon samtang nagbagulbol, apan nagpanuko sa pagpadayag kay nahadlok nga taktakon.

Kini ilabi na nga dunay nag-text kanila nga nanghulga, nga siya ra ba kuno ang katapusang moendosar sa ilang ngalan sa City Hall, ug mahimo silang matangtang kon sila mo “garagara.”

Mao gyud na ang pagkasuwat nga gipaagi sa group chat sa mga kawani sa Parks and Playground Commission og nakakita gyud ko niini.

Aron pagmatuod nga dili hinimohimo ang reklamo, ang mga JO sa Parks and Playground Commission, mihimo og reklamo nga ilang gipadala ngadto kang Daisy Dianna Ortiz, ang pangulo sa Personnel Department sa City Hall.

Gihinganlan nila sa reklamo ang duha ka babayeng kawani sa Parks and Playground Commission nga giingon nila nga maoy nagpaluyo sa “illegal collection.”

Pugngan lang usa nato ang ilang mga ngalan, samtang patubagon pa sila sa kadagkoan sa City         Hall.

Sayod ko nga way labot niini si Mayor Edgar Labella kay sus, P20 nga kolektahon sa matag empliyado? Sa kagamay sa maong kantidad dili bulingan ni Labella ang iyang ngalan niini.

Apan ang akong awhag kang Mayor Labella nga mandoan nimo ang pangulo sa Personnel Department ug ang City Legal Office nga dalion ang paghimo’g imbestigasyon, ug dili ra kay taktakon ang hingtungdang kawani nga nangilkil.

Angay sila nga pasakaan og kaso ug papirmahon og reklamo ang mga nangreklamo ngadto sa City Hall. Ang rason kuno kay ang matigum sa kolektahon nga tag P20 kada JO, ihatag kuno sa mga disbursing officer.

Hala, angay’ng motingog niini ang mga disbursing officer nga maoy tighatag sa sweldo sa Parks and Playground Commission kon gihatag ba gyud kaninyo ang kwarta kay pang-snack kuno.

Wa kaha kini himoa usab sa ubang department sa City Hall? Palihug Mayor Edgar, ipasusi gyud ni kay makadaot gyud ni sa imong administrasyon.