Gihimong gatasan ang COVID-19

Halos tanan gipalukapa niining COVID-19, nanira ang mga negosyo nga misangpot sa pagkawagtang sa trabaho sa mga tawo.

Ang pandemic nakamugna og gutom sa katawhan human nakulban sa kaldero, walay gipilli mga kabus ug adunahan mitiyabaw sa epekto sa virus.

Apan kong adunay nangahagba aduna usay mituyhakaw ug milambo nga panginabuhian tungod sa diskarte sa ilang kinabuhi.

Tinuod baya nga naay nangadato kadtong mga mga negosyo sa mga gikinahanglan kaayo niining panahona.

Apil niini ang mga hospital tungod sa kadako sa bayad sa mga pasyente nga na COVID-19 nga nasagolan na sa mga kahiwian pinaagi sa conspiracy sa mga badlongon nga tawo sa tambalanan ug sa kagamhanan.

Pwera sa nagtinarong apan sibaw na kaayo ang nahitabong kurapyon diin gigamit ang COVID-19 isip gatasan nga makakawkaw sa kwarta sa katawhan.

Duna nay mga hospital ug mga kawani sa ahensiya sa kagamhanan ang napasakaan og kaso tungod sa pagkalambigit sa kurapsyon.

Gawas sa isyu sa mga hospital, anaa usab diay gigahin ang PhilHealth nga pundo alang sa Community Isolation Package nga usa ka benipisyo sa mga miyembro.

Kadtong mga PhilHealth member nga masulod sa isolation facility nga accredited sa ahensiya dunay budget nga kapin sa P22 mil.

Gahin kini sulod sa 14 ka adlaw nga isolation sa pasiyente apan mahiadto isip bayad sa pasilidad dili sa pasyente.

Kong daghan ang masulod sa isolation mas dako ang kita nila busa gihulagway kini ni Governor Gwen Garcia nga usa ka lucrative business.

Nakapangutana ang gobernadora nganong sige man gyud pangitaon ang mga COVID-19 infected bisan kadtong walay symptom ug mao diay aron daghan ang masulod sa facility kay lalima ka og P22 mil ang makolekta pagkadakoa sa kwarta.

Dili man kita mohukom kay nakatabang man usab sila sa pagpakgang sa COVID-19 transmission apan klaro naman gud kaayo.

Kadtong mga symptomatic nalang ang ipaubos sa swab test ug isulod sa facility samtang kadtong asymptomatic monitoron nalang kay daghan man mga walay symptom ang naayo ra nga walay medical intervention.

Niadtong niaging tuig pa diay kining community isolation unit package benefit ug dako na gyud ang napagawas nga kwarta alang sa programa.

Samtang gipasabot sa PhilHealth nga alang kini sa health insurance sa mga miyembro, maayo man aron wala nay huna hunaon ang mga miembrong pasyente.

Hinaut nga dili maabusohan kini ug mahiadto sa nga miyembro ug dili sa mga tawong adunay interest sa kwarta nga gikan sa buhis sa katawhan.