Kinsa’y di mahadlok?

Dili gyud makabasol ang kadagkoan sa Department of Health (DOH) kon ang katawhan mahadlok nga mo-undergo sa ipahigayon nga Strategic Rapid Covid Testing diha sa kabarangayan.

Kataw-anan ang giingon ni DOH-7 Regional Director Jaime Bernadas nga dili kuno makapatakod og coronavirus ang dili kanunay’ng pag-ilis og rubberized nga gwantis sa mga health frontliners nga mohimo sa testing.

Ang kamot sa frontliner nga mohimo sa Covid testing mohikap gyud sa nawong sa tawo nga i-subject nila og testing, unya dili makapatakod kon kini positive sa virus, bisan ihikap kini sa laing tawo?

Gitambagan man gani ninyo ang katawhan sa paglikay lang una sa paglamano, pagbisobiso ug paghawok aron paglikay sa coronavirus. Kinsa gud tawon ang motoo sa inyong gisulti.

Unya, labaw pa nga salawayon ang napublikar nga pamahayag sa hepe sa kapolisan dinhi sa dakbayan sa Sugbo nga pangdakpon kuno kadtong mga mosupak nga mahimoan og Covid testing.

Ang angay’ng pugson pag-undergo og Covid Testing mao kadtong mga nakahugoy-hugoy ug nagkaduol sa mga nagpositibo sa virus, ug kini mao ang kapolisan nga gidestino sa mga dapit nga daghang Covid positives.

Kadtong mga nakadawat og Special Amelioration Program (SAP) cash assistance, angay’ng maoy kuhaan og Covid testing, ug dili ang mga tawo nga naa ra sa ilang balay ug wa moapil sa mga nagpunsisok aron nga makadawat sa hinabang gikan sa kagamhanan. 

Sa ako na nga giingon, ang Rapid Covid Testing angay’ng adto kini himoon sa mga dapit nga pwerteng daghana nga mga positibo. Mahal kaayo ang mga gipamalit nga Covid testing kits ug usik kon gamiton sa mga tawo nga wa gyuy gawas-gawas sa ilang balay.

Unta, mahinuktokan kini sa mga opisyal sa kagamhanan aron nga ang daginoton nila nga budget, magamit sa mas importante nga kagamitan.

* * *

Dili gyud tinuod nga dunay “house-to-house” nga pagpanuroy aron ilista ang mga hatagan og SAP cash assistance. Moingon mo nga ang gisugo nga mga kawani sa barangay miadto gyud sa kabalayan? Tell that to the dead marines!

Diri sa amo wa gyud motungas ang mga gipangsugo aron unta makita nila ang kahimtang sa mga tawo nga nagkisi-kisi nga sila hatagan sa maong hinabang.

Resulta, dunay mga tulo sa usa ka balay nga gipublikar na ang ilang mga ngalan nga kuno makadawat sa hinabang. May naapil pa gani sa listahan nga makadawat sa SAP nga usa ka dos-anyos.

Samtang ingon niini ang sitwasyon, dunay uban nga hilabihan gyud tawon nga pobreha apan wa gyud maapil kay gituman nila ang awhag nga magpaabot ra sa ilang balay sa taga DSWD ug barangay.