Paggamit sa pondo sa kalamidad

Napulog usa ka barangay sa dakbayan sa Sugbo ang wala tugoti sa Commission on Audit sa paggamit sa ilang pondo sa kalamidad tungod sa ilang kapakyas sa pagsunod sa mga patakaran niini.

Sigun sa patakaran sa CA, ang 30 porsiyento nga Quick Response Fund sa Calamity Fund magamit lamang pinasikad sa deklarasyon sa barangay ubos sa kalamidad.

Ang barangay mapaubos lamang sa kalamidad kun 20 porsiyento sa papulasyon niini ang naapektohan sa kalamidad. Mao ni karon ang naproblemahan sa 11 kaBarangay sa dakbayan sa Sugbo tungod kay sa dihang ilang gipaubos sa kalamidad ang ilang barangay wala nila masunod ang patakaran sa CA.

Dili nako mabasol ang mga kapitan sa maong mga barangay nga nakalapas sa patakaran sa CA sa paggamit nila sa pundo sa kalamidad tungod sa panginahanglan sa pag gamit niini.

Panahon sa kalamidad walay lain nga rumbohon ang mga biktima kondili ang mga opisyal sa barangay. Mao nga sila ang magkaproblema sa pagpangita og pondo nga magamit sa ilang panginahanglan.

Apan kun gidili sa CA ang paggamit sa 11 ka barangay tungod sa kapakyas niini sa pagsunod sa patakaran sa CA sa pag gamit sa 30% nga Quick Response Fund diin gikinahanglan usab ang 20% nga papulasyon nga apektado, nganong wala man gidili sa CA sa kagamhanan sa dakbayan ang paggamit sa Quick Response Fund nga unta gikinahanglan man nga 40% sa papulasyon sa dakbayan ang apektado sa kalamidad una pa niini magamit ang ilang Quick Response fund?

Mas maayo seguro nga hatagan ta niini og husay sa CA.