Mora’g ngalan sa gatas

Taliwala sa kalibog sa mga Senador sa kadaghan sa mga letra nga gigamit sa pag-ila sa kinatawhan kon gender sa usa ka nilalang, misugyot si Senator Sotto nga tawgon na lang ang mga nahisakop sa LGBTQIA+ community nga mga “homo sapiens”. Makalibog tinuod kay wala pa gani masabti sa tanan ang mga letra nga LGBT, nadugangan na usab ug QIA, aduna pa’y gipuno nga plus (+).  Matud pa sa akong higala nga bayot, “Mora na hinoon kami ug gatas nga Nido ug Pediasure…naay Plus”. Alegre!

“Go” na ang signal light

Nagkinahanglan ang kagamhanan sa Dakbayan sa Sugbo og balor 500 milyones ka pesos aron igasto paghulip sa karaan na nga Sistema sa traffic signals sa tumong nga masulbad na ang problema sa trapiko sa dakbayan. Sa kadugay nga pinaabot, misiga na gayod  ang “green” (GO)  nga suga alang sa maong proyekto. Hinaut nga dili na usab kini maabtan sa ‘yellow’ (CAUTION) ug ‘red’ (STOP) nga signal.

Lumba sa banca ug jeep

Adunay nag-ambo karon nga pag-phase out sa mga motorbanca sa Lapu-lapu City kansang mga kasko kahoy pa ang gigamit, nunot sa laraw sa MARINA nga iduso na ang ilang “vessel modernization program”.  Malantawan nato nga adunay lumba nga mahitabo tali sa mga motorbanca ug sa mga jeepney.  Apan dili kini lumba kon asa kanila ang kusog modagan kon dili lumba kini kon asa kanila ang unang ma-phase out!

Task force baho

Miumol karon ang Konseho sa Dakbayan sa Sugbo og usa ka Task Force kansang tumong mao ang pagwagtang sa baho nga naggikan sa mga hugaw sa tawo diha sa City Jail sa Kalunasan. Dili hinoon piho kon “Task Force Wagtang Baho” ba ang gihingalan kanila apan kon molampus sila sa ilang tumong, hayan mailisan na ang pagya nga “Hayahay pa sa Pulis” ngadto sa “Hayahay pa sa Priso”.

Way kalooy karon, unya na

Duha ka miyembro sa Gabinete ni Presidente Duterte ang imbestigahon tungod sa alegasyon sa korapsyon.  Misaad si PACC Commissioner Greco Belgica nga dili sila mopakita ug kalooy sa ilang pag-imbestigar. Dili ba kaha unya na ihatag ang kalooy inig pagawas na nila sa resulta sa imbestigasyon? Nangutana lang!