Diha sa kauban

Matag usa nato nangandoy baya gyud og kasegurohan. Gikan sa relasyon ngadto na tingali sa bisan unsang ekonomikanhon.

Mao tingali nga malisud alang nato ang kausaban. Dili pa lang dugay ang rabit maoy nahimo nakong kalipay. Upat sila ka buok tanan nga akong kumpay kumpayan.

Wala lang tuyoa nga nalibkas ko ang mga pulong sa panghimaraot sa dihang pagka sunod adlaw akong nasuta ang paborito nakong rabbit gikawat.

Mao nga tulo nalang ka buok ang akong rabbit. Lisud kaayo silang makaguba sa halwa nga ilang nahimutangan. Tingali dunay naibog  sa iyang kaambongan mao nga sa hawla siya gikawat sa mga kamot nga maigmat.

Ang bugtong seguro sa kalibutan nga dunay kausaban mao nga dili maayong mahilansang sa giisip natong bililhon kay pinaagi lamang niini kita nahimong binilanggo nga kita mismo ang naghimo.

Binilanggo kita sa gugma nga dili tinuod. Binilanggo kita sa kaibog nga makasunog. Mao nga kun moabot ang gitawag nilang kausaban malisud alang nato ang pagdawat niini.

Ang tanan moabot, mopundo apan sa kadugayan molabay ra sa gihapon. Kini tungod kay ang matag usa kanato dunay atong kaugalingong panahon. Ang maong rabbit nga pinangga nako tingali panahon na niya aron kawaton sa mga tawong suheto kaayo ug nagpaniid sa nahimutangan niya.

Sakit man tuod palandongon apan didto na lang gyud tingali siya kutob.

Sa atong panaw sa kinabuhi angayan nga mamahimo kitang flexible sa mga kausaban. Mausab man tuod ang tanan apan ang Dios dili mahitabo nga mausab ngari nato.

Padayon kita niyang mahalon ug kun ugaling biyaan kita sa kadaghanan siya magpabilin ra sa gihapon. Salamat sa Dios nga gipaila ko niya sa kahulogan sa gitawag nilang kausaban. Kay ang maong kausaban moabot ug mo surpresa kanato.

Ug kun makasinati ka man gani niini andama daan ang imong kaugalingon sa pagadangatan ning tanan. Malamaton ang pagtuo nga dunay permanente mas tinuod bisan sakit ang kamatuoran nga dunay kausaban.