Husto ang pasidaan

Wala masayop ang akong pasidaan nga mamahimong way kapuslanan ang pagpamugos nilang outgoing Governor Hilario Davide III ug Bise Gobernador Agnes Magpale sa katukuran sa P1.3 bilyones nga Capitol Resources Center tungod kay siguradong dili na mahinayon ang maong proyekto.

Si governor-elect Gwen Garcia miprangka nga wa malakip sa iyang prioridad ang pagtukod sa maong edipisyo nga iyang gihulagway nga pag-usik-usik sa kwarta sa katawhan. Matud ni Garcia sukad kaniadto di niya polisiya ang pagpangutang.

Mapasigarbuhon siya nga sulod sa siyam ka tuig niya nga pagdumala sa Kapitolyo kaniadto, way utang ang probinsiya gawas sa mga bayranan sa mga supplier dihang mikanaog siya sa katungdanan. Numero uno sab ang lalawigan sa tibuok nasud atol sa iyang administrasyon.

Dili makamahay si Davide tungod kay gipasidan-an siya nga di magdali-dali sa maong proyekto ug huwaton nga mahuman ang eleksiyon. Apan ambot ngano, gidali-dali nila pagsugod ang proyekto bisan sa kalapasan sa lagda sa National Historical Affairs Commission.

Karon nga dili ipadayon sa bag-ong gobernador ang proyekto, mobayad si Davide ug Magpale sa nagasto na sa kontraktor ug sa P1.5 bilyones nga ilang giutang sa Development Bank of the Philippines?  Kun duna pa unta silay ka-ikog sa mga Sugboanon, gihuwat unta nila nga mahuman ang eleksiyon tungod kay dili man nila mahimong ipamugos ang maong proyekto sa mosunod nga gobernador.

Luoy ang kontraktor nga naangin sa pagharab-harab nilang Davide ug Magpale sa maong proyekto.

* * *

Sa Dakbayan sa Sugbo, makapaabot sab ang proponent sa P18 bilyones nga proyekto diha sa Kawit Island nga nahimo na karon nga kabahin sa South Road Properties nga usbon sa bag-ong administrasyon ang mga kondisyon diha sa ilang kontrata uban sa dakbayan sa Sugbo.

Andam hinuon silang mayor-elect Edgardo Labella ug vice mayor-elect Michael Rama nga padayonon ang proyekto bisan kun gibabagan kini sa ilang mga kaalyado ug gitinguha gyud gani nga hunongon.

Apan matud nila nga kinahanglang dunay renegotiation nga mahitabo tali sa dakbayan ubos sa bag-ong administrasyon ug sa United Hotels and Resorts Inc. (UHRI) nga maoy proponent sa proyekto.

Medyo salikwa-ot hinoon ug kadudahan ning ilang baruganan tungod kay gisupak man ang maong proyekto sa ilang mga kaalyado. Gani misang-at gyud sila og kaso sa korte aron babagan ang proyekto. Unsa may ilang motibo, hinaut dili ni makapaidlas sa mga negosyante nga mobobo og puhonan dinhi sa dakbayan.