Pasalig ni Garma
Tungod sa daghang mas mahinungdanong isyu nga gituki nato sa miaging semana, wala na kita makahisgot pa sa problema kabahin sa ilegal nga sugal, sama sa video karera, moli-moli ug illegal swertres.
Kini maoy hinungdan nga misamot pag-ayo ang pagkatap sa mga illegal gambling machines ug illegal swertres sa Barangay Pasil, Barangay Suba, Barangay Ermita ug Duljo-Fatima.
Ambot kaha sa Barangay Tejero ug Carreta kay wala pa ko makadawat og report sa akong tigpaniid.
Kataw-anan kaayo kay apil sa mipahibawo nako nga daghang video karera ug moli-moli sa Duljo-Fatima, miangkon nga nag-operate usab siya og gambling machines.
Gusto niya nga himoan og tinud-anay nga operation sa kapolisan ang Duljo-Fatima.
Ang rason diay kay kon mamutang kuno siya og gambling machines sa maong barangay, dili mosugot ang mga polis.
Ngano kaha no? Unsa man, polis ang nag-operate sa mga karera sa Duljo ug dili sila gusto nga may kumpetensya?
Mahimo sab nga ang tag-iya sa maong mga gambling machines, may “special agreement” sa mga polis nga dako ang iyang payola nga ihatag basta siya ra ang tugotan nga maka-operate sa Duljo.
Apan na-intriga ko sa pipila ka report nga akong nadawat nga kuno may “blessing” ni Senior Superintendent Royina Garma ang pag-operate niining maong mga sugal, ug nagdawatan kuno si Garma og payola gikan sa mga gambling operator.
Suod kaayo ni Presidente Duterte kini si Garma ug dili pa ko motuo nga ingon niini ang iyang batasan.
Posible nga ang iyang mga police chief maoy nagdawatan ug mao nga wala lang mohimo og aksiyon batok sa mga illegal gambling sa ilang teritoryo.
Kini maoy hinungdan nga gikontak nako si Garma ug gipahibalo sa pagdagsang na sa mga illegal gambling machines ug ubang sugal diha sa mga barangay nga atong gihisgotan.
Abtik kaayo nga mipasalig kanako si Garma nga himoan dayon niya og operation ang mga illegal gambling diha sa Pasil, Suba, Duljo ug Ermita, ingon man sa mga area sa Waterfront Police Station.
Nagpasalamat si Garma sa mga kasayuran nga gihatag nato kaniya isip feedback.
Buyno, hatagan usa nato og higayon si Garma nga iprobar nga dili tinuod nga siya nagdawatan na og payola gikan sa mga gambling operator.
Bi, pahibaw-a ko ninyo kon may operation ang kapolisan diha sa inyong dapit, kay usahay ra ba, abtik sila nga mo-operate apan ibalik ra ang mga gambling machines kon kini lukaton sa mga operator.
I-text ang inyong mga report sa 0943-0766611. Kompletoha lang sab ang detalyi.
- Latest