Kabaw nga programa

Duha ka programa sa gobiyerno ang nahisama sa kabaw nga gikabay-an sa mga kandidato sa eleksiyon sa barangay nga kaalyado ni Mayor Tomas Osmeña. Ang duha ka programa nga akong gihisgotan dinhi mao ang Long Life Medical Program nga gipasiugdahan sa kagamhanan sa dakbayan sa Sugbo ug ang P10 mil nga pautang sa nasudnong kagamhanan alang sa panginabuhian sa mga kabus.

Ang Long Life Medical Program mao ang pagpanghatag sa kagamhanan sa dakbayan sa Sugbo og libre nga tambal sa mga masakiton, apan gigamit kini sa mga kandidato nga kaalyado sa mayor sa pagpamalit og boto ngadto sa mga nakapahimulos niini. Ang mga nakapahimulos sa tambal gipangpinahan na, o gipanghulga nga putlan sa ilang libre nga tambal gikan sa dakbayan sa Sugbo kon dili nila suportahan ang kandidatora sa mga alyado sa mayor. Luoy tawon pud ang mga kandidato nga mikabayo sa Long Life Medical Program. Ngano man? Kay nagpakita man kini nga wala sila’y salig sa ilang kaugalingon.

Pero ang pinakaluoy mao gyud kadtong mga kandidato nga nangangkon nga gikan kanila ang gipanghatag nga tambal. Nangangkon sila sa programa nga bisan gani ice water nga mainom sa naghatod sa tambal, wala gani sila makahatag.

Laing programa nga gikabay-an sa mga kandidato nga kaalyado ni Osmeña mao ang P10 mil nga pautang nga iya sa nasudnong kagamhanan. Gikabay-an sa mga kaalyado sa mayor ang maong programa nga paghatag og puhonan alang sa panginabuhian sa mga kabus, ug gigamit kini sa pagpanghulga. Ang mga beneficiaries sa programa gipinahan ug gihulga sab nga dili makadawat sa P10 mil nga puhonan kon dili makadaog ang ilang mga kandidato sa eleksiyon karong Mayo 14.

Usahay, ang eleksiyon daugon gawas sa salapi, sa lingla, lansis, bakak ug mga panghulga, maong kinahanglan nga lantip kita sa pag-ila sa tinuod ug sa dili tinuod.