Online predator

Laing tulo na usab ka bata ang na-rescue sa mga sakop sa Regional Women and Children Protection Center (WCPC) sa pakig-alayon sa International Justice Mission (IJM), usa ka Non-Government Organization didto sa lungsod sa Cordova.

Sama sa nangagi pa nga mga kaso, gibahug usab sila sa mga online predator nga mga masakiton og utok kinsa hangol nga mopahimulos sa kainosente sa mga bata pinaagi sa cyber technology.

Nadakpan ang usa ka 25-anyos nga babaye nga maoy migamit sa mga bata ug mibaligya sa ilang hubo ug law-ay nga mga video ug hulagway ngadto sa iyang mga kliyente nga langyaw.

Mga kadugo ra usab niya ang iyang gipatukob sa gitawag nga mga online predator. Gani lakip sa gi-rescue ang iyang dos anyos nga anak kay posible nga gigamit usab niya sa iyang panguwarta.

Giangkon sa suspek, diha nga akong giestorya, nga mihimo siya sa naasoy’ng modus tungod lagi kuno sa kalisud, ug mokita siya og P3 mil kada transaction nga ipaagi sa money remittance center ang bayad.

Sa akong tan-aw himsog man og lawas ang babaye nga makahimo sa pagpangita og trabaho kay batan-on pa man usab siya, apan mao lagi ang katapolan maoy gipasulabi kinsa gusto mokita nga wala’y hago, apan ang nakaparat kay ang mga bata man ang iyang ilawog sa kaalaotan.

Kining problemaha dugay na apan nagpadayon pa man gihapon. Gani nabantog man ang Cordova sa ingon niini nga tinonto diin daghan na ang nangadakpan.

Ang cyberpornography dili lang sa Cordova, kon dili, anaa usab sa halos tanang dapit nga adunay internet access. Busa hagit sa mga hingtungdang ahensya, ilabi ang mga LGU sa pagtutok sa problema alang sa hingpit nga kasulbaran niini.

Kanus-a man?