BRT vs LRT

Girekomendar sa Department of Transportation ug Office of the Presidential Assistant for the Visayas ngadto sa National Economic Development Authority ang pagkanselar sa gisugyot nga Bus Rapid Transit.

Si DOTr Secretary Arthur Tugade ug Michael Lloyd Dino mihimo sa rekomendasyon ngadto sa NEDA Investment Coordination Committee.

Ang NEDA-ICC nga gipangulohan ni Finance Secretary Carlos Dominguez gipaabot nga magtagbo karong semanaha aron hisgotan ang isyu.

Ang rekomendasyon gihimo human ang Cabinet secretary mimando nga aksiyonan ang kamandoan ni Presidente Duterte nga moduso og rekomendasyon sa NEDA kabahin sa BRT project.

Ang DOTr mimugna og Inter-Department Task Force nga gilangkoban sa mga undersecretaries sa Administration and Finance, Planning Development, Legal Affairs and Procurement ug Road Transport and Infrastructure sa pagtuon ug pag-evaluate sa proyekto apil ang ubang isyu.

Human sa review sa task force, girekomendar niini nga kanselahon ang BRT project dinhi sa Sugbo. Ubay-ubay nga rason ang nakita sa task force sa pagkanselar sa proyekto, sama sa pagkalangay sa paghuman sa detailed engineering design.

Sigun sa task force, ang engineering design mahuman na unta niadtong Disyembre 31, 2017 pero Marso 31, 2018 na lang, wala gihapon kini makompleto. Ang pag-angkon sa right of way ug pagkuha og consultants, apil usab nga nalangay.

Nunot sa rekomendasyon sa DOTr ug sa Office of the Presidential Assistant for the Visayas nga kanselahon ang BRT project, dili na gyud kaha ni matuman? Senyales ba kini nga nagmadaugon na si Mike Dino batok ni Mayor Tomas Osmeña?

Kon mao man kini, matuman na kaha ang LRT project nga maoy gituohan ni Mike Dino nga sulbad sa suliran sa trapiko dinhi sa Sugbo.