Indifferent

Mas maayo pa kuno nga magdumot ka kay sa mamahimong indifferent sa usa ka tawo. Kay ang tawong indifferent dili na magtagad ug dili na magpakabana sa hingtungdan. Kini tungod kay ang maong tawo dili na man mahinungdanon alang niya. Ang maong tawo alang niya, wala na kinahanglana aron siya magpakabuhi pa. Kini ang nahitabo sa dato sa ebanghelyo nga nag-asoy sa kinabuhi sa sanlahon nga si Lazaro. Wa man tuod siya’y gihimong dautan apan ang maong dato wala pud mohimo kun unsay husto. Wala niya tabangi si Lazaro. Mao nga sa adlaw sa panghukom nahimo siyang nasilotan gumikan sa iyang kaugalingong binuhatan. Daghan ang ingon ana karong mga panahona. Apan ang maayo tingaling himuon mao nga kun diha sa paghimo og maayo dili na kinahanglanon nga kini nindot ug di kasarangan. Himoa ang bisan unsa nga simple apan kinasingkasing kay aron diha sa atong kamatayon dili na kita mahadlok pa.