EDITORYAL - Atop sa motor makapeligro?

Daghan g’yud sa mga Filipino ang mga utokan ug maayo mohimo’g pamaagi aron matubag ang panginahanglan. Sama niining pagbutang og plastic nga atop sa mga motorsiklo aron nga kon mokalit pagbunok ang uwan, dili g’yud kaayo mahumod ang nagsakay. Tuod, kusog kaayo ang halin niining mao nga baligya.

Apan niining bag-o lang, usa ka konsehal sa dakbayan sa Sugbo ang misugyot og ordinansahon nga magdili sa paggamit niining mao nga mga atop diha sa mga motorsiklo kay makahatag kuno og peligro, ug adunay kahigayonan nga makamugna kini og aksidente, apan wala siya’y detalyi kon pila ka aksidente nga naglambigit og motorsiklo nga ang hinungdan mao ang pagbutang og atop.

Tinuod, kon kusog ang hangin, sama pananglit kon adunay bagyo, posible nga ipadpad ang motorsiklo ug hayan nga dili na makahinimbang pag-ayo ang drayber. Apan nasayod usab niini ang mga driver nga nagmaneho og motorsiklo nga dili maayong mogamit sila niini kon kusog ang hangin.

Ang maayong hinuktokan sa mga konsehal sa dakbayan sa ilang pagtuki niining mao nga ordinansahon nga ang pagbutang og atop sa mga motorsiklo, makapugong pa gani sa mga driver nga dili magkiat sa ilang pagmaneho. Sagad sa mga motorsiklo nga nagtaod niining mao nga matang sa atop, mabinantayon kaayo sa ilang pagmaneho.

Tungod sa gitaod nga atop sa motorsiklo, mokalma na ang mga driver sa kiniat nga pagpadagan sama sa gihimo sa ubang motorista nga ingon sa sila maoy hari sa karsada.

Daghan kaayo nga angay’ng himoan og lakang sa mga konsehal sa dakbayan, sama nianang mga nagmaneho og bisekleta nga bisan og “stop signal” apan mopaturatoy gihapon sila pagpadagan nga makahatag og risgo sa mga driver kon sila madam-agan. Kini unta maoy angay’ng himoan og lakang sa mga utokan nga magbabalaod sa dakbayan.