Treason tungod sa Sabah

Migimok na usab ang balita nga ang Pilipinas mi-downgrade sa “claim” niini sa Sabah aron ibaylo sa suporta sa Malaysia sa arbitration case sa nasud batok sa China mahitungod sa panag-ilog sa  teritoryo sa West Philippine Sea.

Giduso ni Kongresista Rufus Rodriguez ang imbestigasyon aron mahibaw-an unsay unod sa “note verbale” nga gitunol sa Department of Foreign Affairs ngadto sa Embahada sa Malaysia.

Sama kang Rodriguez, daghan ang naalarma sa gikatahong pagbiya sa Pilipinas sa pag-angkon niini sa estado sa Malaysia nga mao ang Sabah nga gihulagway sa kongresista nga aduna kitay “very good legal title” niini.

Kun tinuod kining kabalaka dili lang kang Rodriguez kun dili sa uban usab nga mga kongresista nga mihumok atong ilong sa atong pag-angkon sa Sabah, usa  kini ka “treason” tungod kay sa sinugdanan ang Sabah iya man sa Pilipinas.

Apan mihimakak ang Malacañang niining maong taho. Siyempre, treason ang atubangon sa tanang tawo sa administrasyon kun masakpan nga nalambigit niining note verbale nga gikatahong nag-downgrade sa kaso sa Pilipinas batok sa Malaysia.

Walay laing paagi aron mahibaw-an ang kamatuoran. Kini mao ang imbestigasyon sa mga kongresista. Apan sama sa Mamasapano massacre, dili mapugos ang presidente sa pagpatambong.

Nanggawas kining isyu sa Sabah human sa insidente sa Mamasapano, Maguindanao diin 44 ka mga kinabuhi sa Special Action Force commando ang nakalas atol sa pagdakop sa international terrorist nga si Marwan.

Ang mga Pilipino nahibulong nganong ang Moro Islamic Liberation Front mas maminaw sa nasud sa Malaysia ug midesider sa pagsumiter una sa ilang report sa Mamasapano massacre ngadto sa Kuala Lumpur. Ang Malaysia nagsilbeng “referee” sa peace process tali sa Pilipinas ug MILF.

Pinaagi usab sa Facebook, nasakpan nga si Mohagher Iqbal sa MILF usa diay ka Malaysian. Apan nakaako kining nakigsabot sa gobiyerno sa Pilipinas nga nagrepresentar sa MILF, apan sulod sa dugay’ng katuigan nga nakig-dialogo kini sa mga sakop sa GPH panel nga ubos sa pagdumala sa Office of the President, wala gyud kini masakpi nga usa diay ka Malaysiano.

Karong bag-o, gisaway si Pres. Noynoy Aquino sa mga netizens tungod sa iyang pamahayag nga “kun dili mapasar ang Bangsamoro Basic Law, mag-ihap kita og bodybags.” Ang buot ipasabot sa presidente nga kun dili nato ihatag ang BBL ngadto sa MILF, magpasabot kini og gubat tali sa Pilipinas ug MILF.

Dungan ni Noynoy ang usa ka dakong opisyal sa Malaysia nga miingon nga daghan ang mangamatay kun dili mapasar ang BBL.

Gipaagi na lang gyud sa Malacañang og panghadlok kay dili na gyud nila mapugos ang mga tawo nga nangyam-id na sa BBL human sa Mamasapano massacre.