Pamolitika g’yud

Husto ang pagtuo sa uban nga pamolitika g’yud ang gihimo ni Vice President Jejomar Binay nga pagbisita sa mga merkado sa lainlaing dapit sa nasud nga iyang bisitahan.

Nagtuo man gud si Binay nga ang ikasangka niya sa pagka presidente sa nasud karong eleksyon sa 2016 mao si DILG Secretary Mar Roxas nga naila na nga “Mr. Palengke.”

Nagpaila lang si Binay nga gikuyawan g’yud ni Mar Roxas kay puwerte g’yud niya nga nakadepensa sa kaugalingon diha sa iyang mga “paid advertisement” sa mga radio.

Ang pangutana kun motuo ba kaha ang katawhan sa iyang pangangkon nga gusto lang g’yud siya nga iduot sa pipila ka senador aron madaut ang iyang kredibilidad?

Bisan asa ko maglakaw-lakaw, mangutana g’yud ko sa mga tawo kun unsa ang ilang baruganan kabahin sa labing kontrobersyal nga isyu nga naglambigit sa bise presidente.

Ang tanan nako nga napangutana wala g’yud molaban, apil na ang mga dumadapig niya dinhi sa Sugbo. Ang mga dumadapig sa Team Rama nga misuporta kaniya sa miagi’ng eleksyon, wala makagusto sa iyang gihimo nga milikay-likay sa Senate Blue Ribbon Committee.

Kadtong mga tawo nga tarong og panghuna-huna dili gayud mobotar kang Binay nga kuwestiyonable kaayo ang kredibilidad tungod sa pasangil kaniya nga matud pa nalambigit sa kurapsyon.

Angay lang nga ang katawhan mopili gayud og tarong nga lider. Duna man gani kahigayonan nga ang mga buotan nga tawo nga atong pilion makat-on na sa binuang kun anaa na sa puwesto.

Busa kun si Binay sensiro g’yud nga magpapili, angay g’yud siya nga moatubang sa senado ug tubagon ang mga pangutana. Unsa may kahadlokan niya kun tinuod man nga wala siya makahimo’g kurapsyon?

Ang iyang pagdikidiki ingon sa maghatag og ideya sa katawhan nga nahadlok si Binay kay dili siya makatubag unya sa pangutana sa mga senador kaniya.

* * *

Hain na man kadto’ng tinguha sa CITOM nga ibalik ang towing operations? Grabe’ng daghana sa mga abusado nga motorista uy! Pataka lang og parking sa ilang mga sakyanan.

Siyaro og si Mayor Michael Rama wala makakita niini? Siyaro og ang kadagkoan sa CITOM wala makakita niini’ng mga sakyanan nga gigamit ang karsada isip ilang grahe.

Unya, miagi ko kagahapon sa karsada nga laktoranan sa Barangay Kamagayan gikan sa P. del Rosario ug molusot ka sa Junquera Street. Ang gamay’ng karsada gisugdan na man pagtukod og mga tindahan.

Unsa, mga buta ang mga opisyal sa barangay? Unsay gihimo sa PROBE nga gipangulohan nila ni Wendel Cenas ug Raquel Arce?