EDITORYAL - Ka-ignorante sa balaud

Salikwaot huna-hunaon kun ang mga tawo nga gitahasan pagpatuman sa balaud wala usab diay masuheto sa lagda nga gusto nila nga ipatuman.

Usa ka resource person sa seminar sa mga reporters mihulagway nga dili kaayo sila makasuwat og pintok nga balita kun wala sila masayod sa balaud nga naglambigit sa isyu nga buot nila suwaton.

Daw nahisama kini sa usa ka tawo nga mosawom sa usa ka lubog kaayo nga tubig, dili siya makakita sa dapit nga iyang padulngan.

Ingon niini ang ubang Barangay Environmental Officers (BEO) nga gikuha sa mga kapitan sa barangay aron manakop sa mga tawo nga magpataka’g labay og mga sagbot.

Ang nakapaet pa gayud kay matud ni Grace Luardo nga maoy nagsuperbisar sa mga BEO nga dunay ubang tinudlo sa mga kapitan sa barangay nga maglisod gani pagsulat.

Kun kini maoy sitwasyon, labaw pa tingali nga maglisod ang mao nga mga BEO pagsabot sa balaud nga gusto nga ipatuman sa kagamhanan ug sila ang gitahasan sa pag-implementar?

Susama ra kini sa ubang tanod sa kabarangayan. Garbo kaayo moangkon nga daghan na sila og mga nadakop nga nahimo sukad sila natudlo nga tanod.

Apan dili sila makasulti kun kanus-a mahimong dakpon ang usa ka tawo nga dili na kinahanglan pa ang warrant of arrest. Dili ba kataw-anan?

Kun ingon niini nga adunay mga tigpatuman sa balaud nga wala masuheto sa balaud nga gitahas kanila nga ipatuman, dili imposible nga magpataka lang sila pag-implementar.