Mga nagpasad nga mga Propeta

Ning nangaging mga adlaw daghang mga tawo diha sa social media ang nangangkon nga sila mga propeta. Kasagaran sa mga unod sa ilang mga panagna naglambigit man sa mga katalagman. Linog, grassfire, gutom, pandemic, bagyo, baha ug uban pa nga mahitabo sa mga nagkadaiyang mga dapit sa kalibutan.

Kining mga tawo nga nangangkon nga sila mga propeta gilangkoban nilang Perez, Simon, ug uban pa. Naa pa toy nag-ingon nga basta mosanting na kuno ang iyang dunggan adunay dili maayo nga mahitabo. Dinhi sa ato naa si Rudy Baldwin nga nagsalig sa iyang vision. Hain kahay maayo no kun atong pangutan-on sila kanus-a ang schedule sa brown out ug unsay mogawas nga numero sa lotto?

Daghan ang nangahadlok. Anaa pud ang mga bugalbugalon. Anaa ang wala makapugong nga tungod niini mohatag sila og mga sakit ug mga insulto nga komentaryo diha sa social media. Apan alang Kanako, kining mga katalagman sama sa linog mahitabo gyud. Kini tungod kay kabahin lamang kini sa mga periodic lihok sa mga tectonic plates. Ang mga hitabo sa adlaw ug ang hitabo sa uniberso kabahin man lamang sa mga schedules nga gilatid niini.

Kabahin lamang kita sa mas dakong uniberso. Ang nahitabo kaniya kagahapon, mahimong mahitabo kini sa karon ug mahimong mahitabo kini ugma. Ang mahinungdanon mag-ampo kita ug mangandam. Busa angayan natong puy-an ang kinabuhi sa husto nga paagi aron dili kita magmahay sa kaulahian. Live as if we will die tomorrow.