Bunot-paningit - Gula 64

"Presko ra ba?" Pulong pa ni Carlo nga wala wad-a sa panagway ang pagpahiyom ngadto sa babaye, "dili tanto," matud pa sa babaye.

"Ganahan lang kong makighigala nimo laay man gud kaayo taas kaayo ang biyahe unya wala koy ka-estorya nalipay gani ko kay sa kataposan may tapad nako," matud pa sa lalaki.

"So, ako ang makawala sa imong kalaay?" Pulong pa sa babaye.

"Di sad oy kuan lang…gusto lang ko nga dunay kaestorya-estorya. Sige ka sa kataas sa atong biyahe unya way buka-buka ang imong baba mapan-os gyud nang imong laway," pagkomedya pa sa lalaki nga gidunganan og ngisi.

"Dili ko bad breath noh. Wa koy halitosis, for your information!" Pag-inarte pa sa babaye, namulong nga wala ang mga mata sa ka-estorya.

"Lagi dili ka bad breath pero kun mapan-os ang laway pwerti bayang baho-a  makaingon tag eeewwww," sa lalaki pa nga padayong gikomedyahan ang babaye ug gihiwi ang nawong dayong sap-ong sa ilong niini.

"Ewww ka dyan. Bisa'g way buka-buka ang akong baba ug way ka estorya dili mahitabo nga manimaho ang akong baba no," matud pa sa babaye nakamatikod si Carlo nga nag-usap diay ang maong babaye.

"Ayyy nahibawo na ko," matud pa sa lalaki.

"Unsay imong nahibaw-an?" pulong sa babaye.

"Mao diay nga confident kang dili manimaho ang imong baba bisa'g wa kay ka-estorya nga wala ka mahadlok nga mapan-os ang imong laway kay nagkaon ka diay og chewing gum mao diay nga humot kaayo imong gininhawa. Mint nang chewing gum nga imong giusap no?

Klaro kaayo sa baho," ni Carlo pa. Unya mipiyong ang babaye giliso ang ulo paingon kang Carlo, pagpiyong dayong buka nga pinasulimbat.

"Wow, cute man diay ka kun mosulimbat na ang imong mata mosamot ka cute," ni Carlo pa nga ingon og gitripan ang babaye.

"Wa jud kay laing lingaw noh? Ako gyuy imong gitripan wa kay laing nabunotan," matud pa sa babaye.

"Korek. Bunot paningit, siete pares, swerte sa siete, from the garden, all up, alay!," matud pa sa lalaki.

"Unsa? Unsa nang imong gipanulti diha?", pagpangunot sa agtang sa babaye nga wala makasabot sa gipanulti sa lalaki.

"Wala oy in short, cute ka," matud pa ni Carlo. Gigamit ni Carlo ang mga termino sa pagduwa og mahjhong.

"Dugay na kong nahibawo nga cute ko dili lang kay ikaw ra ang misulti niana in fact, mura na ko’g mabungol anang sige'g kadungog ana'ng cute ko," sa babaye pa nga miisa ang usa ka kilay.

"Woww confident," matud pa sa lalaki nga mipaak sa pula niyang ngabil.

"Natural! Kay confident man gyud ko bisan asa ko ibutang ikaw sad confident sad ka. Pero dili ko ganahan sa imong pagka confident kay presko," matud pa sa babaye.

"Hahayyyy.... gwapa unta ka pero estrikta lang pero okay lang. Ganahan ko kay challenging," ni Carlo pa unya mitutok sa babaye ug sa makausa pa gitunol na sab ang tuong palad kay gustong makig-shake hands, "Carlo ko" pagpaila na sab ni Carlo sa maong babaye.

"Hahayyy.... sa kadaghang lingkuranan nganong diri man ko napunta oy," matud pa sa babaye nga wa gyud modawat sa kamot sa lalaki mi-snob pa.

"Kana kay we're meant to be destiny," matud pa sa lalaki nga wala gyud buhi-i ang panan-aw ngadto sa babaye ug padayong gitunol ang kamot.

"Unsa? Hala ha assuming ka ganahan ka’g magtiayong sagpa?" sa babaye pa. (Sumpayan)