Mangtas ang iyang asawa

Pagmata ni Dencio wala na si Teray sa iyang tupad. Gitan-aw niya ang relo nga nagpatong sa may lamisita ug iyang nasuta nga lapas na sa tunga’ng gabii.

“Hain kaha si Teray, ay?” Mao ni midugkal karon sa naglibog nga hunahuna ni Dencio. Sukad sila gikasal ni Teray ingon sa may kausaban na ang mga lihok niini.

Matag kilumkilom mogawas kini sa balay ug usahay makita niya nga dunay mga sagbot nga balili ang ulo niini nga mura’g nakalkag na ang mga buhok.

Karon, tunga’ng gabii na ug wala si Teray sa iyang tupad. Maayo gani kay nakamata siya ug sa iyang paghinol sa iyang kilid bakante ang gihigdaanan ni Teray.

Midali’g bangon si Dencio ug migawas sa balay. Gitawag niya si Teray.

“Terayyyy! Terayyyy! Hain ka gud? Terayyyyy!” dili kaayo kusog ang iyang pagtawag apan niining mga orasa, medyo mura’g lanog na ang tingog ni Dencio sa pagtawag niya sa iyang asawa.

Taudtaod dunay tingog nga nadunggan si Dencio, tingog sa wakwak nga mura’g diha ra sa iyang duol.

“Wakkk! Wakkkk! Wakkk!” nagkanayon ang tingog sa wakwak. Unya, ingon sa mitugpa kini sa may atop sa ilang balay nga nagpadayon sa pagwakwak.

Wala na mopadayon si Dencio pagtawag kang Teray kay gibati siya’g kahadlok sa tingog sa wakwak. Wala ra ba siya kadala’g hait nga pinuti o sundang ba nga iyang itigbas kun pananglit mohamag kaniya ang wakwak.

Mosaka na unta siya’g balik sa ilang balay diha nga may mikalit og hagsa dapit sa iyang likoran. Sa iyang paglingi, maoy iyang nakita si Teray nga kalkag kaayo ang buhok.

Nagbarog kini nga nagtingsi nga mura’g duna nay bangkil ang mga ngipon.

“Uy, Terayyy! Kangil-ad nimo’g nawong! Usa ka diay ka ungo! Ungo ka diay, Teray!” nakalitan si Dencio sa iyang nakita ug misibog siya aron mosaka na sa taas sa balay, apan giduol siya ni Teray ug gikuptan.

“Dencio, wala lang tika sultii sa akong sekreto nga ako usa ka mangtas nga ungo. Ug palihog lang tawon nga dili ko nimo ipanabi ni bisan kinsa, salig ko nimo,” ni Teray pa nga naningkaang ang buhok.

Unya mikalit kini’g lukso nga mura’g milupad pahilayo kang Dencio. Kahilakon si Dencio nga naghunahuna sa pagkatawo sa iyang asawa nga usa diay ka mangtas nga ungo.

Mitulo na g’yud ang iyang mga luha ug unya misulod siya sa balay. (Katapusan)