Gilubngan og lana sa ungo
Sugilanon - Faustine Jave Ybañez Papa - Locon, Alegria, Cebu (Banat) - August 5, 2015 - 10:00am

Bag-o pa nga mibiya ang kangitngit karong buntaga. Apan sibaw na kaayo ang radyo ba’ba’ nga mibalita sa nahitabo kaganinang kaadlawon. Hapit tanang nakasaksi gusto nga sila maoy paminawon.

“Sayo kaayo nanglayas ang pamilya ganinang alas dos sa kaadlawon,” taho ni Emyat nga gialirongan sa mga silingan.

“Ala una y medya pa man ang oras sa akong relo, diha’ng milayas sila,” pasiatab ni Tonya.

Daku’ng kisaw sa Barangay Cotcoton ang paglayas sa pamilya nilang Oking ug Rissa. Gipakatap sa mga libakera ang tabi nga tinuod sila nga mga ungo.

“Daku’ng kalapasan sa balaod sa Diyos ug sa tawo ang inyong gibuhat. Wala pa gani kamo masayod sa hinungdan sa ilang paglakaw, inyo na nga gihusgahan,” ni Barangay Kapitan Vic Real.

“Gahapon Kap, paglakaw sa pamilya padulong sa siyudad, amo dayon nga gilubngan og lana sa ungo ang ilawom sa ilang balay. Ganinang kaadlawon, nanglayas silang tanan,” hirit ni Ebyang, ang hara sa mga libakera.

Unom na ka buwan nga nagpuyo sila si Oking ug Rissa dinhi sa Barangay Cotcoton. Napalit nila ang balay ug lote nga gipanag-iya ni Joshua. Lisod sila nga makita sa ilang silingan. Matulog sa adlaw ug manglakaw sa gabii.

Nakurat ang tanan sa pagpauli sa magtiayong Oking-Rissa uban sa ilang duha ka anak. May daku nga hikay nga gitagana sa ilang panimalay. Imbitado ang mga opisyal sa barangay pinanguluhan ni Kapitan Vic. Imbitado usab ang tanan nila nga silingan.

“Mga higala, salamat kaayo sa inyong pagsanong sa akong imbitasyon. Dako usab namo nga pasalamat sa kahitas-an sa dako namo nga daog sa lotto. Hinungdan nga miadto kami sa Manila aron pagkubra sa daog. Ug kaluoy sa Ginoo, miundang na kami pagtrabaho didto sa siyudad matag gabii. Daghang salamat.”

Tinan-away lang ang nabuhat sa mga silingan sa ilang nadungog. Unya gidalit ang bongga nga pagkaon. (Kataposan)

ACIRC ANG BARANGAY COTCOTON BARANGAY KAPITAN VIC REAL DAKU GAHAPON KAP IMBITADO KAPITAN VIC MGA NGA RISSA
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with