Impakta

Igo gayud nga nakabiya si Joseph sa balay sa kauban niyang membro sa usa ka relihiyosong kapunongan sa dalan F. Ramos nga maoy iyang cluster head sa Single Adult Men (SAM), dihang misugod ang taligsik sa ulan.

Naandan na niya nga matag Domingo, kun way laing kalihokan ang ilang relihiyosong kapunongan, makig-one-on-one siyang makigsulti kang Ernie, nga hanas na kaayong mopaambit sa mga pulong sa Ginoo diha sa Bibliya.

Gusto ni Joseph nga makakat-on  siya ug dugang sa mga pulong sa Ginoo, aron iya kining puy-an ug aron ang Ginoo mahisentro na gayud sa iyang kaugalingon.

Nagbag-o na siya sa kinabuhi. Biyaan na niya ang iyang mga bisyo. Gikan sa iyang pagkagumon sa paghithit og shabu, gusto na siyang mag-usab sa iyang kinabuhi, ilabi na nga ilo na siyang tuwapos sa edad nga 36 nga nagpabiling ulitawo sa iyang gipuy-an sa dalan Echavez. Maoy gisaligang panginabuhian ni Joseph ang binulang abangan sa unom ka blokeng apartment nga iyang nasunod sa mitaliwan na niyang mga ginikanan.

Naglakaw lang si Joseph gikan sa dalan F. Ramos, paingon sa iyang gipuy-an sa dalan Echavez. Nagpadayon ang taligsik. Gipasiklapan ni Joseph ang iyang relo-de-pulso. Lapas na sa tungang gabii. Sa nagdangadanga na siya sa tulay sa dalan Echavez nga giatbangan sa mga dagkong punoan sa kahoy nga nakangiob sa dalan, pun-an sab sa mga karaang dagkong balay sa atbang, may nasigpatan si Joseph nga  may babayeng nagtindog nga nagsul-ob og lubos itom nga bestida nga kutob sa paa ang gitas-on.

Miamag ang puting panit sa nagtindog nga babaye, lakip na ang mga bugol nga paa niini. Atol sab nga wa gyuy nangaging mga taksi ug dyip pasaheroan niadtong orasa nga nagpadayon ang ginagmay’ng tutaligsik.

Kalit nga namugnaw ang lawas ni Joseph. Nagkibotkibot ang iyang baba dihang nahitungod na gayud siya sa tulay nga gitindogan sa babayeng puti nga nagsul-ob og lubos itom nga bestida.

“Kaguwapa ning bayhana! Humm! Nabaniog ra ba nga abtanan kining tulay sa dalan Echavez...!”ug nabatyagan ni Joseph nga inanay’ng nanindog ang iyang balhibo. Gikuptan niya ang krus sa iyang kwentas nga iyang gipalugwa sa iyang dughan. “Ssst! Dali, duol nako...!” nabati ni Joseph ang lawom ug paraygong sitsit sa babayeng nagsul-ob og lubos itom nga bestida nga mikamay kaniya.

Daw gilamat si Joseph sa talagsaong katahom ug kaputi sa panit sa maong babaye nga nagtindog daplin sa tulay. Abtik ang iyang mga lakang nga miduol niini ug gitutokan ang guwapang dagway sa nagtindog nga babaye.

“Hi-hi-hi! Joseph, guwapo....!” mingisi ang guwapang dagway sa babaye nga nasentro sa pagtutok sa migilaw nga krus sa kuwentas ni Joseph diha sa iyang dughan. Kalit lang nausab ang dagway sa guwapang babaye nga miaso ug nahimong kalabera! “In Jesus name! Impakta...! Impakta...!” nakasinggit si Joseph nga mikaratil og dagan paingon sa ilang balay sa dalan Echavez eskina sa dalan Lorega. Tinuod gayud diay ang nabaniog nga huhungihong nga usahay, mopakita diha sa tulay ang mga daotang espiritu panahon sa kagabhion. (Kataposan)