Suspek gipatay
CEBU, Philippines — Patay ang usa ka 31-anyos nga lalake human gipusil sa duha ka mga wala pa mailhing suspetsado sa Sitio Kalumboyan, Barangay Buhisan, siyudad sa Sugbo pasado alas-9 sa buntag kagahapon, Lunes, Pebrero 16, 2026.
Ang biktima mao si John Maglasang alyas Libat, 31, residente sa naasoy nga dapit. Nasayran nga ang biktima naglakaw sa lugar ug duna kini kauban sa dihang kalit kini gipusil.
Naigo ang biktima sa likod nga bahin sa lawas nga maoy hinungdan sa kamatayon niini.
Nasuta nga ang biktima maoy suspek sa nahitabong pagpamusil sa Barangay Buhisan sa miaging buwan.
Ang biktima gaduda nga ang iyahang gipusil asset ug maoy nagsumbong niya sa otoridad human nga gi-surveillance kini sa kapulisan.
Matud pa nga dunay warrant of arrest sa kasong frustrated murder ug giingong nagtago-tago kini sa otoridad.
Tanang anggulo ang gisubay karon sa kapulisan diin apil na niini ang kalambigitan sa illegal nga drugas.
Samtang duna na say gipangtan-aw nga mga tawo ang kapulisan sa Labangon Police Station 10 nga posibleng may kalambigitan sa krimen. (BANAT NEWS)
- Latest
