Nag-nervous breakdown napusilan sa polis
CEBU, Philippines — Napusilan sa polis ang usa ka lalaki nga armado og ice pick human kini gikatahong agresibong niatake dihang gialarma diha sa Bihonan, Barangay Cansojong, Dakbayan sa Talisay niadtong Miyerkules sa gabii.
Gikataho nga si alyas “Maribel”, 47-anyos, nagpuyo sa dapit ang nitawag og pakitabang sa kapolisan.
Kini human ang iyang silingan sa kwarto nga si alyas “Roger” kinsa armado og ice pick ang nag-wild ug nangita og away.
Ang mga sakop sa Special Weapons and Tactics (SWAT) niresponde niini ug nisuway sa pagpakalma sa suspetsado.
Apan giingong wala mopatuo sa mga polis ang suspetsado ug agresibo na hinuon kini nga niatake sa mga polis gamit ang ice pick.
Ang mga polis napugos sa pagpabuto sa armas ug napusilan sa batiis ang suspetsado aron kini mokalma.
Matud ni Police Corporal Christopher Lerio, imbistigador sa Talisay City Police Station nga ang suspetsado nakasinati og nervous breakdown hinungdan nga agresibo kaayo kini.
Ang suspetsado dali kining gidala sa tambalanan human sa hitabo. — /BDB (BANAT NEWS)
- Latest
