Lola nga abortionist nadakpan

CEBU, Philippines — Tulo ka mga tawo lakip ang usa ka 75-anyos nga ginang nga gitumbok nga usa ka abortionist ang gisikop sa hiniusang entrapment operation sa kapulisan diha sa usa ka inn nga nahimutang sa Barangay Carreta sa Cebu City niadtong Huwebes sa udto, Hunyo 19,2025.
Ang operasyon gilusad sa mga sakop sa RSPU7, RID7, CMFC Cebu City nga niresulta sa pagkasikop sa 75-anyos nga ginang nga taga Talisay City, samtang ang middleman taga Dakbayan sa Danao ug ang driver sa motor.
Matud pa nga nadakpan ang tulo pinaagi sa nagpakaaron-ingnong babayeng mabdos nga gustong magpataktak sa iyang gisabak ug nasabotan nga diha kini buhaton sa sulod sa maong inn.
Ang operasyon gihimo may koneksyon sa matud pag pagkadiskubre og tulo ka mga masuso nga gisulod og plastic container nga naukayan sa sud sa usa ka plastic recycling plant sa Liloan niadtong Hunyo 13,2025.
Personal nga nisusi silang PRO-7 Regional Director P/BGen. Redrico Maranan ug CCPO City Director Police Col. Enrico Figueroa human sa operasyon.
Ang maong lola matud pa ang miangkon nga siya tig-abort og mga bata gikan sa tagoangkan sa inahan.
Lakip sa nasikop sa maong operation nga naa sa maong dapit ang lalaki nga giingong maoy middleman ug ang driver sa motor nga gisakyan niini.
Nasakmit sa kapolisan ang mga nagkadaiyang gamit sa suspek sa paglaglag sa bata ug ang buy-bust money.
Matud pa ni Maranan, gimando niya ang lapad nga operasyon sa tibuok rehiyon aron pangitaon ang mga tawo nga nalambigit sa abortion sa mga bata.
Matud pa nga nakuha nila ang impormasyon sa grupo gikan mismo sa social media nga diin didto matud pa nagtanyag sila og abortion hinungdan nga gipahigayon gilayon ang entrapment operation .
Ang mga dinakpan nangangkon nga dili mominos P40,000 ang bayad sa pagpa abort nga tungaon sa middleman ug maong tiguwang.
Ang mga dinakpan matud pa nitug-an nga 2021 pa sila gabuhat ani.
Gitan-aw pa karon sa kapulisan kung ang mga masuso nga nakit-an sa Liloan konektado ba sa mga dinakpan.
Kutob sa makuha nilang impormasyon gikan sa tulo, paninguhaon sa kapolisan nga ma-trace kun si kinsa kadtong mga babayeng nagpataktak sa ilang gimabdos.
Sumala pa ni Maranan dakong risgo sa mga kababayen-an ang pagpaubos og mga susamang ilegal nga pagpataktak sa ilang gisabak sa mga kamot sa tawong walay medical background ug sa dili sanitized nga palibot.
Apil sa imbestigahon ang maong lodge kun wala ba silay kalapasan nga nahimo o kung dugay na ba kining gihimo sa grupo diha sa ilang establisamento.
Nanawagan si Maranan sa mga nahimong kliyente sa grupo kun adunay silay reklamo mahimo silang mopatim-aw sa kapulisan ug mopasaka og kaso.
Samtang ang ginang nga dinakpan nitug-an dul-an pa siya sa usa ka tuig nihimo sa pagpang-abort ug gihimo niya kini tungod sa kalooy.
Sumala pa niya daghan ang magpakitabang niya og maghilak nga ipakuha ang ilang gisabak kay dili pa sila gusto nga mainahan o kaha daghan na sila og mga anak.
Matud pa niya sulod sa usa ka tuig dili mominos sa 15 na ka mga higayon siya nakapang abort , apan para niya ‘dugo’ palang kini kay dili pa kompleto kay sagad wala pay buwan nga gimabdos.
Giangkon sab niya wala masayod ang iyang pamilya sa iyang binuhatan diin makadawat lang siya P4,500 ngadto sa P5,000.
Gitug-an sab niya nga makadaghan na siyang nakapahigayon og abortion sa maong lodge.
Samtang ang middleman nibutyag tungod kay daghan man moduol niya mao iyaha kining dalhon sa maong tigulang kay makakwarta siya og P15,000 matag transaksyon.
Ang kapulisan niandam na karon sa pagpasang-at ug tukma nga kaso sa mga dinakpan may kalabutan sa abortion. IBM BANAT NEWS
- Latest