No Wangwang Policy hugtan sa pagpatuman sa LTO

CEBU, Philippines — Nipahimangno si Land Transportation Assistant Secretary Vigor Mendoza II nga kun walay emerhensya, walay pagamit sa wangwang diha sa kadalanan.

Matud pa ni Mendoza, klaro kaayo ang kamanduan ni President Ferdinand "Bongbong" Marcos may kalabutan sa pagamit sa wangwang ug kun si kinsa ra usab ang makagamit niini.

Si Mendoza kinsa mibisita dinhi sa dakbayan sa Sugbo gumikan sa pipila ka kalihukan miingon nga pahugtan sa ilang buhatan ang pagpatuman sa  No Wangwang Policy  sa presidente.

Ang pagamit sa sirens, blinkers ug dome lights kinahanglan lang panahon sa mga emergency situations.

Giklaro ni Mendoza, bisan ang mga opisyal sa Local Government Unit ug Land Transportation Office personnel wala gitugotan sa paggamit sa blinkers gawas kung kini emerhensya.  (BANAT NEWS)