Ayuda sa nasunogan sa Talisay ihatag karon

CEBU, Philippines — Gikatakdang ipanghatag karong adlawa ang pinansyal nga ayuda alang sa mga apektado sa sunog sa Barangay Lagtang, Dakbayan sa Talisay.

Nasayran miabot sa 20 ka panimay ang naugdaw atol sa sunog niadtong Huwebes sa hapon.

Gipahimutang ang apektadong pamilya sa basketball gym ug gihatagan og libreng pagkaon sud sa tulo ka adlaw ug uban pa nga butang nga ilang magamit.

Lakip sa gisusi nga hinungdan sa sunog mao ang gikatahong butane ug ingon man ang giingong pagsikit sa linya sa koryente sa atop sa usa ka panimay.

Matud pa ni Talisay City mayor Gerald Anthony “Samsam” Gullas nga itunol nila ang pinansyal nga ayuda uban sa hinabang ni kongresista Rhea Gullas.

Sa evacuation center, gisiguro ni Gullas nga adunay lugar para sa mga inahan nga ipahigayon ang psychosocial intervention kung gikinahanglan kay di lalim ang nasunogan.

Sigon pa ni Gullas nga naa sab silay medical station aron paspas nga maatiman ug adunay mahatag nga libre nga tambal.

Samtang sa laing bahin nakadawat og pinansiyal nga ayuda ang 318 ka pamilya sa siyudad sa Lapu-Lapu nga biktima sa demolition.

Sa maong gidaghanon, 214 ka pamilya nakadawat og P21,000.00 ug ang 104 ka pamilya nakadawat usab og P20,000.00 nga tabang pinansyal.

Suma pa ni Lapu-Lapu City mayor Junard "Ahong" Chan nga ang paghatag og pinansiyal nga ayuda maoy kabahin sa usa sa ilang gisaad panahon sa kampanya nga walay mahitabong demolisyon. MEL BANAT NEWS