Sakop sa NPA nitahan

CEBU, Philippines — Boluntaryong ni-surrender ang usa ka miyembro ug laing usa ka dumadapig sa New People’s Army sa miaging adlaw, nahitabo kini sa Barangay Sampongon ug Desamparados, Lungsod sa Calape, Probinsya sa Bohol.

Nahimo kini pinaagi sa hiniusang lakang sa Provincial Mobile Force Company (PMFC) ug Bohol Police Provincial Office (BPPO) sa ilang Internal Security Operations.

Ni-surrender si alyas Victor nga matud pa sa kapulisan usa ka regular member sa NPA ug si alyas Maria nga giingong miyembro sa masa nga tigpaluyo sa mga rebelde.

Gitahan sab sa duha ang 12 gauge shotgun uban ang 13 ka bala niini.  Ang maong mga armas gitugyan sa Bohol Provincial Forensic Unit.  Giproseso na sab sa kapolisan ang duha aron maapil sa Enhanced Comprehensive Local Integration Program (ECLIP) o Kauban sa Reporma Program (KRP), usa ka localized version sa national ECLIP, as per Executive Order No. 27 Series of 2023 nga gipirmahan ni Governor Erico Aristotle Aumentado.

Duna say himoong lakang aron luwas sila makauli sa ilang lugar ug tabangan nga makapanginabuhi aron di na sila mobalik sa kabukiran.

Ang pagtahan sa duha nadungan sab sa nahitabong engkwentro sa Bilar, sa maong probinsiya nga niresulta sa pagkamatay sa lima ka sakop sa NPA ug usa ka polis.

Dili lang sab agresibong police operations ang gihimo sa PNP apan gipaniguro sab nila nga ang mga dumadapig sa mga rebeldeng grupo makombinsir nga mobalik sa sabakan sa gobiyerno ilabi na matod pa sagad nila giilad ra mga rebelde sa ilang mga sayop nga ideolohiya