Mga Obispo supak  sa People s Initiative

CEBU, Philippines — Si Archbishop Jose Palma sa Archdiocese of Cebu nakighiusa sa mga ka obispohan sa Catholic Bishops Conference of The Philippines sa ilang pagsupak ug pagpahunong sa People s Initiative nga nagtinguha sa pag-amender sa pipila ka mga provisions sa 1987 constitution.

Matud ni Palma nga silang tanang mga Obispo atol sa ilang tigom nagkahiusa nga dili mosuporta sa gipahigayon karon nga Peoples Initiative nga nanguha og mga pirma sa katawhan.

Si Palma nagkanayon nga nasayod sila nga dili perpekto ang constitution apan sa pagkakaron mao usa kini ang ilang nakita nga maayong constitution ug walay kasigurohan usab nga kong usbon kini mahimong maayo ang dagan.

Si Palma nagkanayon nga dili na kinahanglan nga ang mga diocese mopagawas og tagsa-tagsa ka baroganan tungod kay usa ra ang ilang stand sa CBCP ug wala usab siya masayod kong ang uban nga mga obispo nagpagawas sa ilang baroganan kalabot sa PI sa wala pa ang ilang meeting sa tanang ka obsipohan.

Matud usab ni Palma nga nasayod siya nga aduna nay mga nakapirma sa maong PI apan ilaha kini nga girespetohan tungod kay ilaha man kini nga katungod ubos sa democratic ug gawasnon nga nasud.

Si Palma naglaom nga respetohon usab ang ilang mga baroganan nga nisupak ug dili mosuporta sa maong gipadagan nga PI ilabi na daghan sa mga nakapirma niini ang wala makaadawat og klaro ug tukma nga pagpasabot.

Dugang ni Palma nga ang katawhan gihatagan og pangutok aron motuon kabahin sa PI ug kasing-kasing aron mamalandong kong husto ba ang maong gipadagan nga kalihokan. (BANAT NEWS)