Mga habal-habal driver ipaubos sa first aid training
![Mga habal-habal driver ipaubos sa first aid training](https://media.philstar.com/photos/2023/12/11/untitled-1_2023-12-11_00-02-59.jpg)
CEBU, Philippines — Ipaubos sa first-aid training ang mga habal-habal driver sa dakbayan sa Sugbo aron mahimong accredited nga first aider nunot sa mga aksidente sa kadalanan sa dakbayan.
Suma pa ni konsehal Jun Alcover kinsa maoy nagpasiugda niini nga dugay na niyang plano nga maghimo og mga programa aron matabangan ang sektor sa mga habal-habal driver.
“Diba daghan kaayog disgrasya, and then kung daghan kaayong disgrasya, kasagaran makalabay sa mga disgrasya kini gyung mga habal-habal, kay sige baya na silang gabyahe, og di sila ang ma disgrasya, sila ang makakita sa disgrasya,” matud ni Alcover.
Uban sa first-aid training, ang mga habal-habal driver mahimong responder tungod kay adunay mga higayon nga ang ambulansya taod-taod pa nga maabot sa nahitaboan sa aksidente.
Dugang ni Alcover nga ang ilang akreditasyon isip first-aiders makapausbaw sa ilang kontribusyon sa komunidad.
Sa pagkakaron, aduna nay kooperatiba sa motor-taxi. Ang kooperatiba mo-tap sa tabang sa dakbayan sa pagpahigayon niining mga first-aid trainings.
Gawas sa first-aid training, plano usab ni Alcover nga mag-organisar ug hygiene seminar para sa mga habal-habal drivers, ingon man motorcycle firefighter gamit ang fire extinguishers, magbansay sa mga habal-habal drivers isip police auxiliary force batok sa krimen, ug moral values formation.
Aron mapauswag pa kini nga mga plano, si Alcover niingon nga mohimo siya og ordinansa nga nagtumong sa pagtukod og ambulansya sa motorsiklo. Makahatag kini og mas paspas nga pagtubag sa panahon sa mga aksidente.
“Kinahanglan duna jud tay mga ambulansya, nga mu motor na duna nay kompleto nga daan sa mga first aid at least kung naa nay emergency maka lusot-lusot dayon atong mga motor,” matd ni Alcover. — /MEL (BANAT NEWS)
- Latest