Pagkoral sa CPA sa SRP baywalk area gipahunong sa OBO

CEBU, Philippines — Ang Office of the Building Official sa Dakbayan sa Sugbo niisyu og notisya ug work stoppage sa Cebu Port Authority sayo sa buntag adlaw nga Huwebes tungod sa matud pa ilegal nga pagkoral sa usa ka bahin sa South Road Property nga walay mga permits.

Matud pa ni Architect Florante Catalan, Chief sa OBO, ang walay fencing permit usa kini ka kalapasan sa National Building Code.

Atol sa pag inspection lugar partikular kanang baywalk area sa may Maritima nasuta nga wala kini mga dokumento sa pagpakoral sa lugar.

Sumala pa ni Catalan, wala usab siya masayod kung nganung wala mokuha sila ug building permit nga dali ra man unta ang pagproseso niini. Gawas sa pagpamulta, gipahunong sa OBO ang pagpatrabo sa koral.

Human sa pag-isyu sa OBO sa maong order boluntaryo ra usab nga gitangtang sa CPA ang koral nga ilang gitukod.

Kahinumdoman nga ang Maritima ug ang luna palibot niini giangkon sa CPA nga ila sanglit parte kini sa reclamation kaniadto. Ang CPA ug City Hall nisangpot sa kinihaay tungod niini. (BANAT NEWS)