PDEA-7 mihimakak bahin sa na-missing nga babaye
CEBU, Philippines — Gimando sa director sa Philippine Drug Enforcement Agency Central Visayas nga si Levi Ortiz ang paghimo og imbestigasyon kabahin sa report nga dunay nagpailang sakop sa ilang buhatan nga midagit og usa ka dalaga sa Barangay Tayud sa Lungsod sa Consolacion.
Ang maong babaye giila nga si Jherica Auman. Ang mga ginikanan sa biktima miingon nga wala na nila igkita ang ilang anak sud na sa unom ka adlaw gikan kini gikuha sa nagpailang ahente sa PDEA-7.
Sa pasiunang resulta sa imbestigasyon sa PDEA-7 wala silay gihimong operasyon sa maong lugar anang panahona.
Apan si Ortiz miingon nga dili kini bag-o, kay kaniadto pa man kanunay gayud maguyod ang pangalan sa PDEA sa mga naghimo og krimen.
Mibahad si Ortiz nga kun mailhan nila kun si kinsa kining mga migamit sa ilang pangalan, ilaha gyud kining pasakaan og kaso.
Si Police Colonel Engelbert Soriano, provincial director sa Cebu Provincial Police Office nimando paghimo og lawom nga imbestigasyon bahin sa maong kaso.
Ang inahan sa maong dalaga nagpakitabang na pinaagi sa social media sa kung kinsa ang nakakita sa iyang anak.
Ang inahan mibutyag nga nakapadala og mensahe iyang anak pinaagi sa messenger nga nagpatabang kay matud pa gidala siya sa usa wala niya mahibaw-ing lugar. —IBM (BANATNEWS)
- Latest
