Misa de Gallo sa Carbon gitinguha nga banhawon

CEBU, Philippines — Gitinguha karon sa hepe sa Cebu City Market Operations Division (MOD) nga si Irvin Cabales nga banhawon karong tuiga ang pagpahigayon og Misa de Gallo sa Carbon Market ug uban pang kalihokan nga dunay koneksyon sa selebrasyon sa Pasko.

Kahinumdoman nga walay Misa de Gallo sa Carbon sa miaging tuig gumikan sa nagkasaka nga kaso sa COVID-19 niadtong higayona.

Matud pa ni Cabales nga kun tugtan sila nga banhawon kini karong tuiga ilaha gyud nga ipaneguro ang istrikto nga pagpatuman sa health protocols sama sa pagmintinar sa physical distancing ug ang kanunay nga pagsul-ob og facemask.

Si Cabales niduso na og proposal sa buhatan ni Cebu City Acting Mayor Michael Rama aron mangayo og pagtugot sa maong butang ug nagpaabot nalang siya sa tubag niini.

Kahinumduman sa nangaging katuigan nahimo kini nga kabahin sa tinuig nila nga Pasko sa Carbon diin ang highlight sa kalihukan mao ang Misa de Gallo nga magsugod sa Disyembre 16 ug matapos sa petsa 24 ug dinhi usab tigsimba si Rama.

Dunay mga higayon kaniadto nga si Cebu Archbishop Jose Palma maoy nangulo sa Santos nga Misa.

Usa usab sa mga kalihokan sa  Pasko Sa Carbon mao ang Belen ug Parol Making Contest kun diin nakanselar usab kini sa miaging tuig tungod sa pandemya.

“Ang nadayon ra gyud sa miaging tuig, mao ang pag-set up nato og dako nga Christmas Tree, “ matud pa ni Cabales. MEL (BANATNEWS)