CCTO nakatala og kapin sa 33K nga nadakpan sa jaywalking

CEBU, Philippines — Gi-awhag sa Cebu City Transportation Office (CCTO) ang publiko nga respitohon ang traffic signs ug dili magpataka og labang.

Ang CCTO nakatala og 33,091 ka mga indibidwal nga nangadakpan tungod sa jaywalking, gikan sa Enero hangtud sa Hunyo karong tuiga.

“Gihangyo namo labi na sa mga nadakpan nga irespeto pud ang atong mga enforcers kay para sad ni maluwas mo sa aksidente,” tipik sa statement sa CCTO.

Nagkanayon ang CCTO nga importante kaayo ang pagtuman sa traffic signs aron maseguro ang kahapsay sa kadalanan partikular na ang paglikay sa problema sa trapiko.

Kadaghanan sa mga violators nibayad ra sa P50 nga penalty ug minos ra ang nipaubos og community service.

Usa usab sa gihingosgan sa CCTO ang pagukod sa illegal nga overnight parking.

Nasayran nga duna gihapoy badlungong mga motorista ang pataka og plastada sa ilang mga sakyanan nga nakabalda na sa kadalanan.

Nanawagan ang CCTO sa mga barangay nga tabangan usab sila sa maong kampanya aron mahimong hapsay ang kadalanan. MEL (BANATNEWS)