Pagpamakuna sa Talisay temporaryong nahunong

CEBU, Philippines — Nagpahigayon na lang og disinfection ug general cleaning diha sa vaccination site sa gym sa Barangay Lagtang, Dakbayan sa Talisay kagahapon.

Kini human nga hangtud karon wala pa sila’y nadawat nga laing bakuna batok sa COVID-19 nga ipangturok ngadto sa mga Talisaynon.

Kini maoy gibutyag ni Dr. Rey Cesar Bautista sa Talisay City Health Office.

Sa niaging duha ka adlaw, nigahin sila sa pagbakuna sa ikaduhang dose apan wala pa makapadayon sa unang dose.

Sa pagkakaron, anaa na sila’y lista sa kapin sa 14 mil ka tawo nga gustong magpabakuna.

Nanghinaot ang CHO nga unta sa sunod semana magahinan na og bakuna ang siyudad aron makapadayon na sila sa ilang pagpamakuna.

Sa laing bahin, si Cebu City Councilor Dave Tumulak nibutyag nga ang nabakunahan sa siyudad sa Sugbo naa pa lang sa 58,038 sukad niadtong Martes diin gilangkuban kini sa A1, A2, A3 ug health care workers.

Matud ni Tumulak nga siyam ka porsyento pa lang kini ug layo pa sa 70 porsyento nga target sa Cebu City government diin tinguha sa siyudad nga 700,000 population niini ang mabakunahan.

Hinuon, nagpadayon ang pagpamabakuna sa siyudad tungod kay anaa pay 6,000 doses sa AstraZeneca vaccines ug sulod niining semanaha hutdon nila kini og gamit.

Si Tumulak nipahibawo kini nga nakasabot na ang siyudad sa duha ka malls diha sa dalan Colon aron mahimong vaccination sites ug mo-cater sa mga tawo nga ubos sa A4 aron mabakunahan.

Nagpaabot na lang ang kagamhanan sa siyudad sa dugang suporta nga ipadala sa Department of Health sama sa doctors ug nurses ug uban pa aron maoy ibutang diha sa duha ka vaccination sites nga gipaabot nga ablihan niining buwana.

Samtang sa Dakbayan sa Mandaue, gisugyot ni Mayor Jonas Cortes ngadto sa Mandaue Chamber of Commerce and Industry (MCCI) nga mohatag og diskwento ngadto  sa mga molupyo sa siyudad nga nakapabakuna na.

Tumong niini mao ang pagdasig sa mga molupyo sa siyudad sa pagpabakuna. —Decemay P. Padilla, Romeo T. Limpangog/BDB (BANATNEWS)