P3.4 milyones shabu nasakmit

CEBU, Philippines — Nasakmit sa Philippine Drug Enforcement Agency (PDEA) -7 ang kapin sa P3.4 milyones nga kantidad nga gituohang shabu ug nadakpan ang duha ka drug personalities sa managlahing gipatumang search warrant sa Barangay Basak Pardo, Dakbayan sa Cebu kagahapon sa hapon.

Ang mga suspetsado giila nga sila Edward Largo, 40, ug Junjie Ablaña nga pulos lumulopyo sa maong barangay.

Si Largo nakuhaan og 33 ka pakete nga shabu nga adunay gibug-aton nga kapin kun kulang 500 gramos nga gibanabana sa Dangerous Drug Board (DDB) nga nagkantidad  og P3,488,400 samtang si Ablaña nakuhaan 47 nga mga putos nga motimbang og 13 gramos nga nagkantidad og P88,400.

Ang PDEA-7 nga gipanguluhan ni IA1 Jonar Cuayzon una nga nagpatuman og search warrant sa pinuy-anan ni Godofredo Largo Jr., 45, ang magulang nga lalaki ni Edward sa Villa San Pedro 1, Cuaco Compound.

Wala si Godofredo sa balay samtang gipatuman ang search warrant samtang si Edward natulog sa sulod. Si Edward miingon nga wala siya’y kalabotan sa ilegal nga drugas nga nasakmit sa sulod sa balay ug kini tanan gipanag-iya ni Godofredo.

Hinuon, giangkon niya nga siya tiggamit og droga. Si Edward adunay mga naunang rekord nga may kalabotan sa druga ug naabsuwelto sa tuig 2018.

Dugang pa niya nga dili sila magkasinabtanay sa iyang magulang sukad sa miaging tuig tungod sa mga personal nga isyu sa pamilya. Giawhag ni Edward ang iyang igsuon nga mopakita sa atubangan sa mga awtoridad sa wala pa ulahi ang tanan.

“Mas maayo gyud nga magpakita naka para aron mahuman ta kay lisod man kaayo ako may naduot na ani nuon imoha maning kuan, maayo anang magpakita ka.... og nakadungog ka ba paminaw ba. Paminaw... mas maayo magpakita ka kontra magtago ka,” sigon niya. Base sa imbestigasyon, si Edward giingong maka-dispose kuno og 500 gramos matag semana samtang si Ablaña nga nagpuyo sa sitio Cogon, makabaligya og 200 gramos matag semana.

Ang duha mag-atubang sa kasong paglapas sa Seksyon 11 sa Artikulo II sa RA 9165. —IBM (BANATNEWS)