Paghatag og bugas sa PUJ drivers gipadayon
CEBU, Philippines — Nagpadayon ang paghatag og tagsa ka sakong bugas sa mga jeepney drivers sa Siyudad sa Sugbo isip ayuda sa kagamhanan samtang wala pa tuguti nga makapamasahero.
Niadtong Hunyo 2, ang kagamhanan sa siyudad nihatag og tagsa ka sakong bugas sa 1,000 ka jeepney drivers ug nagpadayon kini kagahapon. Giingong daghang namasin nga maapil sa ayuda hinungdan nga giklaro ni Atty. Rey Gealon, tigpamaba ni Mayor Edgardo Labella nga ang criteria sa pagkuha sa bugas kinahanglang jeepney driver gyud ug miyembro sa kooperatiba.
Gihimug-atan ni Gealon nga sa pagkakaron ang PUJ drivers lang una ang hatagan og ayuda tungod kay ang mga taxi drivers karong Hunyo 7 tugutan naman nga makabiyahe. Subay niini, si Gealon niingon nga gituki pa sa siyudad ang paghatag sab og ayuda sa ubang mga drivers sama sa habal-habal nga wala sab tuguti nga makadagan sa kadalanan ingon man sa ubang sektor kansang pangibuhi apektado tungod sa Covid-19.
Hangyo sa kagamhanan sa siyudad sa mga jeepney drivers nga mokuha sa ayuda nga mosunod gyud sa social distancing ug magsul-ob gyud og face mask. /GMR (BANATNEWS)
- Latest
